එක්සත් ජාතීන්ගේ මානව හිමිකම් කොමසාරිස්වරිය ශ්‍රී ලංකාව සම්බන්ධයෙන් ඉදිරිපත් කළ වාර්තාව මානව හිමිකම් සැසිවාරයේදී ඊයේ වැඩිදුරටත් සංවාදයට ගැනුණා.

එහිදී නිරීක්ෂණ මට්ටමින් සැසියට එක්වෙමින් අදහස් දැක්වූ අමෙරිකානු නියෝජිතයා කියා සිටියේ මෙරට සුළු ජනකොටස් කොන්වීමේ තත්ත්වයක් පිළිබඳ වාර්තා මෙන්ම නිදහස් මාධ්‍ය ඇතුළු සිවිල් සමාජයේ අවකාශ සීමාවීම් සම්බන්ධයෙන් තම අවධානය යොමු කරන බවයි.

''යුද සමයේ විවිධ චෝදනාවන්ට ලක්වූ හමුදා නිලධාරීන් ඉහළ තනතුරුවලට පත් කරලා තියෙනවා. විශේෂමෙන්ම පරීක්ෂණ කොමිෂන් සභාවලට වගවීමේ ක්‍රියාවලිය බලාත්මක කිරීමේ හැකියාව තිබිය යුතුයි. අතුරුදන්වූවන් පිළිබඳ කාර්යාලය දේශපාලන බලපෑම්වලින් තොරව ක්‍රියාත්මක විය යුතුයි. ශ්‍රී ලංකාවේ දිගු කාලීන සාමය, ආරක්ෂාව සහ සශ්‍රීකත්වය උදෙසා වගවීමේ, යුක්තිය සහ සංහිඳියාව ප්‍රවර්ධනය කිරීමේ මනා වැඩපිළිවෙළක් ද ක්‍රියාත්මක විය යුතුයි. ''

කෙසේ වෙතත්, අමෙරිකා එක්සත් ජනපදය ඇතුළු ඇතැම් බටහිර රටවල් නිසි සාක්ෂිවලින් තොරව මානව හිමිකම් කරුණු මතු කරමින් සංවර්ධනය වෙමින් පවතින රටවලට දැඩි පීඩනයක් එල්ල කරන බවට චීන විදේශ කටයුතු අමාත්‍ය වෑන් යී මහතා චෝදනා කරනවා.

විදේශ කටයුතු අමාත්‍ය දිනේෂ් ගුණවර්ධන මහතා සමඟ දුරකථන සංවාදයකට එක්ව චීන විදේශ අමාත්‍යවරයා අවධාරණය කළේ රටවල අභ්‍යන්තර කටයුතුවලට මැදිහත් නොවීම ඇතුළු එක්සත් ජාතීන්ගේ ප්‍රඥප්තියේ අරමුණු සහ මූලධර්ම සුරක්ෂිත කළ යුතු බවයි.

එක්සත් ජාතීන්ගේ මානව හිමිකම් කවුන්සිලය මෙවර අමෙරිකාව නියෝජනය කරන්නේ නැහැ.

ඒ මානව හිමිකම් කවුන්සිලය කුහක, ආත්මාර්ථකාමී සංවිධානයක් ලෙස හඳුන්වමින් හිටපු අමෙරිකානු ජනපති ට්‍රම්ප් 2018 වසරේ දී ඉන් ඉවත්වීම හේතුවෙන්.

මේ අතර, සිරියාවේ ස්ථාපිත ඉරාන සහය ලබන කැරළි කණ්ඩායම් ඉලක්ක වෙත අමෙරිකානු හමුදාවන් අද ප්‍රහාර එල්ල කළ අතර එය සැලකෙන්නේ අමෙරිකානු නව ජනාධිපති ජෝ බයිඩ්න් යටතේ ක්‍රියාත්මක වූ පළමු යුද ක්‍රියාන්විතය ලෙසයි.

මේ අතර, ශ්‍රී ලංකාවට එරෙහිව ඉදිරිපත්ව ඇති 46/1 යෝජනාව ඊයේ සංවාදයට ගැනුණු අවස්ථාවේදී ඔස්ට්‍රේලියාව, ස්විට්සර්ලන්තය, අමෙරිකා එක්සත් ජනපදය, බෙල්ජියම ඇතුළු රටවල් කිහිපයක් ඊට සහය පළ කර තිබුණා.
ඉන්දියාව, පාකිස්ථානය, චීනය, ජපානය ඇතුළු රටවල් කිහිපයක් ශ්‍රී ලංකාවට එරෙහි යෝජනාවට සහය පළ කළේ නැහැ.

මානව හිමිකම් සැසිවාරයේදී ශ්‍රී ලංකාව සම්බන්ධයෙන් අදහස් දක්වමින් ඉන්දියාව කියා සිටියේ දෙමළ ජනතාවගේ අයිතීන් සුක්ෂිත කිරීම සහ රටේ ඒකීයභාවය පවත්වා ගැනීමට 13 වන සංශෝධනය මුළුමණින්ම ක්‍රියාත්මක කළ යුතු බවයි.