ප්‍රේක්ෂක හදවත් වැළඳගත් දේවින්ද වික්‍රමසිංහට අදට 35යි! උපන්දිනය දවසේ ඔහු අපට කියූ විශේෂ කතාව.." - Devinda Wickramasinghe - Hiru Gossip, Lanka Gossip | Hirugossip | Hiru Gossip | Hiru Fm Gossip | Hiru Gossip Official Web Site |Lanka Gossip

May

ප්‍රේක්ෂක හදවත් වැළඳගත් දේවින්ද වික්‍රමසිංහට අදට 35යි! උපන්දිනය දවසේ ඔහු අපට කියූ විශේෂ කතාව.."

251 Views

පුංචි තිරයේ වගේම රිදී තිරයේත් තමන්ගේම අනන්‍යතාවයක් ගොඩනගාගත් දේවින්ද වික්‍රමසිංහ කියන්නේ කා අතරත් ජනප්‍රිය චරිතයක්.

විශේෂයෙන්ම මේ දිනවල හිරු ටීවී ඔස්සේ විකාශනය වන "පාට කුරුල්ලෝ" ටෙලි නාට්‍යයේ "බිග් බ්‍රදර්" විදිහට ඔහු ප්‍රේක්ෂක හදවත් තදින්ම වැළඳගෙන අවසානයි. ඔහුගේ 35 වැනි උපන්දිනය යෙදී තිබෙන අද දවසේ, කාර්යබහුල මොහොතක උනත් ඔහු අප සමඟ කතාබහට එක්වුණේ බොහොම නිහතමානීවයි.

දේවින්ද, කොහොමද අද දවසේ අලුත් තොරතුරු?

"අද ඉතින් ඇත්තටම විශේෂ දවසක්නේ. (සිනාසෙමින්) මගේ 35 වැනි උපන්දිනය තමයි අද. හැබැයි ඉතින් වෙනදා වගේම අදත් මම ඉන්නේ ෂූටින් වල. අදත් චිත්‍රපටයක වැඩකටයුතු වලට තමයි සම්බන්ධ වෙලා ඉන්නේ. කලාකරුවෙක් විදිහට තමන්ගේ උපන්දිනය දවසේත් ප්‍රේක්ෂකයෝ වෙනුවෙන් නිර්මාණයකට දායක වෙන්න ලැබීමත් එක අතකින් ලොකු සතුටක්."

දැන් ඔබ ක්ෂේත්‍රයට ඇවිත් සෑහෙන කාලයක් වෙනවා නේද?

"මම ක්ෂේත්‍රයට එන්නේ 2002 අවුරුද්දේ, ඒ කියන්නේ මම පාසල් යන වයසේදී. එදා ඒ පටන් ගත්තු පුංචි ගමන තමයි අද මාව මේ තැනට අරගෙන ඇවිත් තියෙන්නේ. කාලය ගෙවුණා පුදුම වේගයකින්. ඇත්තටම මම අද ඉන්න තැන ගැන සහ මේ ආපු දීර්ඝ ගමන ගැන හිතද්දී ලොකු සතුටක් සහ තෘප්තියක් දැනෙනවා."

අද දවසේ ලැබුණු විශේෂම සුබ පැතුම ගැන මතක් කළොත්?

"(සිනාසෙමින්)මට නම් ඇත්තටම ලැබෙන හැම සුබ පැතුමක්ම එක වගේ විශේෂයි. මට ආදරය කරන රසික රසිකාවියන්, මගේ පවුලේ අය, යාළු මිත්‍රයෝ මේ හැමෝම දක්වන ආදරය තමයි මගේ ලොකුම ශක්තිය. ඒ නිසා මේක විශේෂයි කියලා වෙන් කරන්න මම කැමති නැහැ, හැමෝම දෙන ආදරය මම ගොඩක් අගය කරනවා."

ෂූටින් ඉවර වෙලා රෑට විශේෂ දෙයක් කරන්න ප්ලෑන් එකක් නැද්ද?

"හ්ම්ම්... ප්ලෑන් කරලා නම් මොකුත් නැහැ (සිනාසෙමින්). හැබැයි ඉතින් දන්නවනේ යාළුවෝ ගැන... සමහරවිට අසංවිධානාත්මකව මොනවා හරි වෙන්න ඉඩ තියෙනවා. ගොඩක් වෙලාවට එහෙම ප්ලෑන් නොකර වෙන දේවල් තමයි හරිම සුන්දර."

ඉදිරි වැඩකටයුතු ගැනත් මතක් කලොත්?

"ඉදිරි වැඩකටයුතු සියල්ලම හොඳින් කරගෙන යන්න තමයි බලාපොරොත්තුව. දැනටත් නිර්මාණ කිහිපයකටම දායක වෙලා ඉන්නවා. මට ආදරය කරන හැමෝටම කියන්නේ, දිගටම මාත් එක්ක ඉන්න, ලබා දෙන මේ ආදරය මට ලොකු හයියක්."

ඉතින් අද වගේ දවසක අපිත් දේවින්දට හදවතින් ම සුබ පතනවා!

"බොහොම ස්තූතියි හැමෝටම! මගේ උපන්දිනය දවසේ මාත් එක්ක මේ විදිහට කතාබහ කරපු එක ගැන මට ලොකු සතුටක් දැනෙනවා. මට ආදරය කරන, මගේ වැඩකටයුතු අගය කරන හැම දෙනාටම මම ස්තූතිවන්ත වෙනවා,"

ඔහු පවසා සිටියේ ඔහුගේ සුපුරුදු ආකර්ෂණීය සිනහවත් සමඟයි.තමන්ගේ දක්ෂතාවයෙන් සහ කැපවීමෙන් ප්‍රේක්ෂක ආදරය දිනාගත් දේවින්ද වික්‍රමසිංහට ඔහුගේ 35 වැනි උපන්දිනයට සුබම සුබ උපන්දිනයක් ප්‍රාර්ථනා කරන අතරම,ඔහුගේ සියලුම ඉදිරි කලා කටයුතු සහ පෞද්ගලික ජීවිතය වගේ ම ඔහු පතන සියලුම අරමුණු ඉටුවන, සාර්ථකත්වයෙන් පිරි වසරක් ඔහුට උදාවේවා අපි හදවතින්ම ප්‍රාර්ථනා කරනවා!