මාගේ උපන්දිනය වෙනුවෙන් සුබ පැතූ ඔබට පළමුව මගේ ස්තූතිය. මගෙ සංගීත දිවියට වසර හතලිහ පිරීම, එදින දානමය පිංකමක් කිරීමට හැකිවීමටත් වඩා මා සතුටු වූයේ රටෙහි ප්රජාතන්ත්රවාදයේ නැත්නම් ජනතාපරමාධිපත්යයේ විශේෂ කඩඉමක් පසුකරන්නට අපට හැකියාව ලද දිනයක් බවට එය ඓතිහාසික වීමය.
මා සහ ස්වාමිපුරුෂයාත් එදින පුදුමයට පත් කරමින් අප නිවස්නට ආ අමුත්තිය පිළිබඳ සතුට මුසු ගෞරවය ඔබ සමග බෙදාහදා ගන්නටත් මෙය අවස්ථාවක් කරගනිමි. ඇය මෙරට ගීත කෝකිලාව, ආචාර්ය සුජාතා අත්තනායක මහත්මියයි.
සුජාතා නැන්දා මා දකින්න එන්නේ අනුරාධපුර සිට. පවත්නා යුගයේ එසේ පැමිණීමේ දුෂ්කරතාව මම ඔබට අමුතුවෙන් කිව යුතු නොවේ.
සුජාතා අත්තනායක ආචාර්යවරියගේ සංගීත ප්රතිභාව වෙනස්ම වූවක්. මා කුඩා දැරියකව සිටි අවධියේ සිටම සිංහල ගීතයට මා ආසක්ත කරවූවන් අතර ඇය සිටින්නේ ඉහලම තැනකය. මා හට ඇය මුණ ගැසෙන්නේ 80 දශකය මැද භාගයේදීය. මාගේ පීතෘත්වයෙහි ලා මම සලකන ධර්මසිරි ගමගේ මාමා, ඇය සහ ඇයගේ ස්වාමියා අතර තිබුණේ සමීප ඇසුරක්. ඔවුන් අතර ගැවසෙමින් සිංහල චිත්රපට සදහා නිර්මාණය වන ගී පිළිබද යම්කිසියාකාරයෙන් දැනුමක් ලබා ගැනීමට මට එම වකවානුවේදී හැකිවිය.
Screen Voice සම්බන්ධ කාරණාවේදී ඇය නොමැති සිංහල චිත්රපට කර්මාන්තයක් ගැන අපට සිතිය නොහැකිවන තරමට ඇය අපව උමතු කළාය. ළගන්නා සුළු හඩ, හඬ තුළ ඇති පරාසය, සංගීතය පිළිබදව ඇති නෛයාත්මකබාවයෙන් ඔබ්බට ගිය දැනුම, වාස්තවික හැදෑරීම ඔස්සේ අප වසඟ කළ ඇයව දශක පහක් දක්වා අද්විතීය ගායිකාවක ලෙස ඔසවා තැබීමට වගබලාගත් සිංහල ගීතයට ලොබ බැදි රසිකයින් අතර මමද සිටිමි.
ඉදින් ශ්රී ලංකා ගුවන් විදුලියේ සිංහල පමණක් නොව දමිල අංශයේද විශිෂ්ට ශායිකාව, තවත් වෙනත් භාෂා හතකින් ගී ගයන්නිය, සංගීත භාණ්ඩ රැසක් වැයීමේ ශක්යතා දක්වන්නිය, එමතුනොව මෙරට අදටත් ජනකාන්ත ජ්යේෂ්ට ගායිකාව, ශාස්ත්රවන්තිය, සංගීතයේ ගායන වාදන දෙඅංශයෙන්ම අධ්යාපනික වශයෙන් ඉහළම නැණනුවණින් සන්නද්ධ සංගීතඥවරිය, නර්තනයෙන්ද ළෙලෙන්නිය, ඉතුත් 13 වන දා අප නිවසේ සරල නිරහංකාර චාම් දෙව් දුවක සේ ගැයුවාය වැයුවාය. මාගේ දරුවන්ගේ කිරිසුවඳට ඇගේ නොවක් ආදරෙයේ උණුහුමද එක්කළාය. උපන්දිනයකට ඒ හැර අගනාතම අන් තිලිණයක් මට හිමිවේද?
අසූ හැවිරිදි නමුත් අපටත් වඩා තුරුණු සුන්දර ජ්යේෂ්ට පිංවන්තියටත් අත්තනායක මාමාටත් නිදුක් නිරෝගීතාව තවදුරටත් පතමින් ඔබ සමග මා බෙදා හදාගන්නේ ඉකුත්දා සන්ධ්යාවේ අප සමග ඇය ගත කළ රමණීය පැය ගණන් අතරින් මිනිත්තු කිහිපයක් පමණි