කෙන්යාවේ එච්.අයි.වී. ආසාදිත පුද්ගලයන්ගෙන් 89%ක් ඔවුන්ගේ තත්ත්වය දැන සිටියහ. කෙන්යාවේ කාන්තාවන්ට එච්.අයි.වී ආසාදනය දැඩි ලෙස බලපායි. එච්.අයි.වී. ආසාදිත වැඩිහිටියන් 1,400,000න් 910,000ක් එනම් 65% කාන්තාවන්ය. වයස අවුරුදු 15-24 අතර තරුණියන් තුළ පැතිරෙන නව එච්.අයි.වී. ආසාදන යෞවනයන් අතර දෙගුණයකටත් වඩා වැඩියෙන් පැතිරේ. සමලිංගික ලිංගික සම්බන්ධතා කෙන්යාවේ නීති විරෝධීය. එහෙත් එරට බොහෝ පිරිමි හා පිරිමි සංසර්ගයේ යෙදෙති. මුඩුක්කු නිවාසවල තරුණ ගැහැනු ළමයි ඉතා ළාබාල වයසේදී ලිංගික සංසර්ගයේ යෙදීමට පටන් ගනිති. නිවාසයේ කුලී ගෙවීම, ආහාර සහ මුදල් සඳහා ලිංගික සම්බන්ධකම් පැවැත්වීමට කාන්තාවන්ට බල කර ඇත. කෙන්යාවේ එච්.අයි.වී. වසංගතය ලිංගික සම්ප්‍රේෂණය මගින් මෙහෙයවනු ලබන අතර එය සාමාන්‍යකරණය වී ඇත. එයින් අදහස් වන්නේ එය ළමුන්, තරුණයන්, වැඩිහිටියන්, කාන්තාවන් සහ පිරිමින් ඇතුළු ජනගහනයේ සියලුම කොටස්වලට බලපාන බවයි.

2015 වන විට ළමුන් 660,000ක් ඒඩ්ස් රෝගයෙන් අනාථ වී ඇති බවට වාර්තා වී ඇත. කෙසේ වෙතත්, ප්‍රධාන ජනගහනයෙන් පුද්ගලයන් අතර අසමාන ලෙස නව ආසාදන සංඛ්‍යාවක් සිදු වේ. 2014දී, කෙන්යාවේ නව වාර්ෂික එච්.අයි.වී. ආසාදනවලින් 30%ක් මෙම කණ්ඩායම් අතර ඇති බවට ගණන් බලා ඇත. ඒ සඳහා භූගෝලීය පිහිටීම ද සාධකයක් වන අතර, නව ආසාදනවලින් 65%ක්ම සිදුවන්නේ රටේ ප්‍රාන්ත 47න් නවයක් තුළ වේ. ප්‍රධාන වශයෙන් කෙන්යාවේ බටහිර වෙරළ තීරයේ මෙය ව්‍යාප්තව පවතී. නවතම දත්තවලට අනුව ඇස්තමේන්තු කර ඇත්තේ කාන්තා ලිංගික ශ්‍රමිකයන්ගෙන් 29.3%ක් එච්.අයි.වී. ආසාදනය සමඟ ජීවත් වන බවයි.

තත්ත්වය මෙසේ තිබියදී මෙම ව්‍යසනය කෙන්යාවෙන් තුරන් කිරීමට එක් හමුදා සේවයෙන් ඉවත්වූ මිනිසෙක් දැඩි උත්සාහයක් දරයි. ඔහු නමින් ස්ටැන්ලි නගාරාය. (Stanley Ngara ) ඔහු ජනතාව අතර උපත්පාලන කොපු ජනප්‍රිය කරවීම සඳහා අසීමාන්තික වෑයමක් දරන මිනිහෙකි. ඔහු කෙන්යාවේ ප්‍රසිද්ධ වී ඇත්තේ ‘‘කොන්ඩම් රජු" යනුවෙනි. "උපත් පාලන කොපු" කී විටම කෙන්යානු ජනතාවගේ මනසෙහි ඇදෙන්නේ ගණිකා වෘත්තියට සම්බන්ධ යම් දෙයකි. ලිංගිකත්වය කතා කිරීම තහනම් මාතෘකාවක් වූ කුටුම්භවල හැදී වැඩුණු ජනතාවකට "ඔබ උපත් පාලන කොපු පලඳිනවාද"යි ඇසීම හෝ ප්‍රසිද්ධියේ එහි යාන්ත්‍රණයන් ගැන සාකච්ඡා කිරීමට හෝ කෙන්යානු සමාජය තුළ ඉඩක් නොවීය. එහෙයින් නව ප්‍රවේශයක් අවශ්‍ය බව ඔහු තේරුම් ගත්තේය. බොහෝ ලිංගික සෞඛ්‍ය පුහුණුකරුවන් විසින් අනුගමනය කරනු ලබන වික්‍රමාන්විත ක්‍රමයට වඩා එයට හාස්‍යය අවශ්‍ය විය. මුලදී ඔහු රූකඩ භාවිත කිරීමට උත්සාහ කළ නමුත් එය තවමත් සම්පූර්ණයෙන් සම්බන්ධ කර ගැනීමට අසමත් විය. එහෙයින් ඔහු හමුදා ඇඳුමකින් සැරසී හිස මත ඔටුන්නක් රඳවා විකාරරෑපී ක්‍රමයකට ජනතාව අතරට ගියේය. ඔහුගේ දීප්තිමත් රතු පැහැති “කොන්ඩම් රජුගේ” නිල ඇඳුමින් සැරසී සිටින ස්ටැන්ලි නගාරා, කෙන්යාවේ ජනතාව අතර ආරක්ෂිත ලිංගිකත්වය සහ ලිංගිකව සම්ප්‍රේෂණය වන රෝගවලින් (ලිංගාශ්‍රිත රෝග) ආරක්ෂා වීම පිළිබඳව දැනුවත් කිරීම සඳහා හාස්‍යය සහ සංවේදනය භාවිත කිරීමට පටන් ගත්තේ එහෙමය.

ඔහු මේ සඳහා උපත්පාලන කොපු දහස් ගණනක් සිය මල්ලේ රුවාගෙන කෙන්යාවේ, නගර, ගම්මාන, වෙරළ තීරයන්, මුඩුක්කු හා ගණිකාවන්ගෙන් සැදි වීදිවල දිවා රෑ ගමන් කරයි. ජනාකීර්ණ වීදියක හදිසියේ ඔහු තරුණ ගැහැනියක් ඉදිරියේ නතර වී මෙසේ අසයි.

වෙනත් මිනිසකුට මෙවන් දෙයක් ප්‍රසිද්ධියේ ඇසීමට ලැජ්ජාය. බයය. එහෙත් හේ හමුදාභටයෙකි. එය නිර්භීතකම සහ ධෛර්යය අවශ්‍ය කරන රැකියාවකි. ස්ටැන්ලි නගාරා ලිංගිකත්වය ගැන කතා කරන්නේ අවිනිශ්චිත වචනවලිනි. යම් අවස්ථාවකදී, ඔහු ලිංගික ශ්‍රමිකයන් පිරිසකට ශිශ්නයක් හැඩැති රබර් කැබැල්ලකට කොන්ඩම් එකක් දැමිය යුතු ආකාරය නිරූපණය කරයි. මෙම මෙහෙයුම හැමවිටම පුද්ගලිකය. කාර්යාලවල සිට වීදි කොනක සහ ගණිකා නිවාස දක්වා සෑම තැනකම ස්වයං ප්‍රකාශිත කොන්ඩම් රජු සිටී.

එච්.අයි.වී. වැඩමුළුවල ආසාදිතයන් සමඟ කතා කිරීම සඳහා ඔහුව විවිධ සමාගම් විසින් කුලියට ගනු ලැබේ. ඔහු යෞවනයන් ආධිපත්‍යය දරන සෑම හන්දියක්ම ඉලක්ක කරයි. එහිදී ඔහු නිරෝගී ලිංගිකත්වය පිළිබඳ දේශන පවත්වයි. හේ අවම වශයෙන් දිනකට උපත්පාලන කොපු 6000ක් ජනතාව අතර නොමිලේ බෙදා දෙයි. මෙම උපත්පාලන කොපු දහස් ගණනින් කෙන්යානු රජය ඔහුට ලබාදෙයි. එහෙත් මේ මිනිසාට මිතුරන් නැත. උපත්පාලන කොපු බෙදන ගණිකා මුඩුක්කුවල ප්‍රසිද්ධියේ අැවිදින මිනිහකු සමඟ මිතුරු විය හැකිද? වාසනාවකට මෙන්, පල්ලියේ දේවසේවකයකු වන ඔහුගේ බිරිඳ සහ ඔහුගේ දරුෙවා් ඔහුට පූර්ණ සහයෝගය දක්වයි.