ස්වයංක්‍රිය කැමරාවන්හි සටහන් වී ඇති අන්දමට එක් කාන්තාවක් කිම් ජෝන් නාම් ගේ මුහුණ මත අත තබත්ම ඔහු වේදනාවෙන් උපකාර ඉල්ලා කෑ ගසන්නට වූයේය. රෝහලට ගෙන යන අතරතුරදී කිම් ජොන්ග් නාම් මිය ගියේය. මුලින් සඳහන් කරන ලද කාන්තාවන්ගෙන් එක් අයෙක් මෙම සිද්ධියෙන් පසුව වමනය කරන රූප රාමුවක්ද පටිගත වී ඇත.

 

 පසුව සිදු කරන ලද පරීක්ෂණ මගින් හඳුනා ගත් පරිදි මෙම ඝාතනයට යොදා ගෙන තිබෙන්නේ ‘‘ වී එක්ස් ’’ ( VX ) නැමැති තහනම් විෂ රසායන වර්ගයකි. එක්සත් ජාතීන්ගේ සංවිධානය විසින් මෙම විෂ රසායනය ‘‘ජන සංහාරක අවියක්’’ ලෙසින් නම් කර ඇත. මෙම උග්‍ර විෂ රසායනයෙන් ග්‍රෑම් එකකින් 1% ක ප්‍රමාණයකින් පවා පුද්ගලයෙක් ඝාතනය කළ හැකි තරම් දරුණු විෂ රසායනයක් බැව් පසුව සිදු කරන ලද පරීක්ෂණ මගින් හෙළි වී තිබේ.

 

මෙම කාන්තාවන් දෙදෙනා අත්අඩංගුවට ගැනීමෙන් පසුව ඔවුන් සඳහන් කරනු ලැබුවේ මෙහිදී ඔවුන් සිතුවේ හාස්‍යෝත්පාදක නාට්‍යයක එක් ජවනිකාවක් ඔවුන් නිරූපනය කරන බවයි. මේ පිළිබඳව තමන් වරදකරුවන් නොවන බැව් අත්අඩංගුවේ සිටි ඉන්දුනීසියානු ජාතික සීති අයිස්‍යාහ් (Siti Aisyah) සහ වියට්නාම ජාතික ඩොඅන් (Doan Thi Huong) කියා සිටියේ මෙම දියරය ඉසීමෙන් මේ තරම් හානියක් සිදු වෙතැයි ඇය විශ්වාස නොකළ බවයි. තමා එය දුටුවේ ළදරුවන් වෙනුවෙන් භාවිතා කරන කිසියම් තෛලමය ආලේපනයකට සමාන ලෙසින් යැයිද ඇය ඉන්දුනීසියානු බලධාරීන්ට සඳහන් කළාය.

 

 මේ අතර කාන්තාවන් වෙනුවෙන් පෙනී සිටින උතුරු කොරියානු නියෝජිතයා කියා සිටින්නේ මෙම විෂ රසායනය මෙම කාන්තාවන් විසින් ඔවුන්ගේ ජීවිත ආරක්ෂා කරගෙන ‘‘කිම් ජොන් නාම්’’ වෙත පමණක් ආලේප කළේ කෙසේද යන්නයි. මේ තරම් මාරාන්තික රසායනයක් එම අවස්ථාවේදී ගුවන් තොටුපොලේ සිටි සෙසු මගීන්ට විෂ නොවී ජොන්ග් නාම්ට පමණක් බලපෑමක් ඇති කළේ කෙසේද යන්නයි.

 

 මේ අතර බොහෝ දෙනෙක් මෙම මරණය සම්බන්ධයෙන් උතුරු කොරියානු පාලනය වෙත සිය අප්‍රසාදය පළ කරන ලදී. නාමික වශයෙන් කොමියුනිස්ට් පාලනයක් පවතින උතුරු කොරියාව පසු ගිය කාලයක් පුරාවම හුදෙකලා රාජ්‍යයක් ලෙසින් පැවැතියේ එරට විසින් සිදු කරනු ලබන න්‍යෂ්ටික අත්හදා බැලීම් නිසාය. දෙවැනි ලෝක යුද්ධය අවසානයෙන් පසුව 1945 වසරේ කොරියාවේ පැවැති ජපන් අධිරාජ්‍ය පාලනය අවසාන විය. 1948 වසරේ ඇති වුණ අර්බුදකාරී වාතාවරණය සමග සෝවියට් කඳවුර සහ ඇමරිකානු කඳවුර වශයෙන් කොරියාව දෙකකට බෙදුණි. උතුරු කොරියාව බිහි විය. පනස් වසරකට ආසන්නව උතුරු කොරියාවේ විශේෂිත චරිතය වූයේ ‘‘කිම් ඉල් සුන්’’ ය. 1994 වසරේ කිම් ඉල් සුන්ගේ අභාවයෙන් පසුව ඔහු ගේ පුත් ‘‘කිම් ජොන්ග් ඉල්’’ බලයට පත් විය. හෘදයාබාධයකට ගොදුරුව ‘‘කිම් ජොන්ග් ඉල්’’ 2011 වසරේදී අභාවයට පත් වූයෙන් ඔහුගේ පුත් ‘‘කිම් ජොන්ග් අන්’’ බලයට පත් විය. ‘‘කිම් ජොන්ග් ඉල්’’ ගේ පළමු විවාහයේ එකම පුත්‍රයා වන ‘‘කිම් ජොන් නාම්’’ගේ ඝාතනයේ අබිරහස පිළිබඳව අදහස් ඉදිරිපත් කරන බිබිසී වාර්තාකාරිනී ‘‘කරිස්මා වස්වානි’’ සඳහන් කරන්නේ ඔහු සතුව ‘‘කිම් චෝල්’’ යන නමින් ගුවන් බලපත්‍රයක් තිබූ බවයි. මැලේසියානු නියෝජ්‍ය අගමැතිවරයා සඳහන් කරන්නේද ‘‘කිම් ජොන් නාම්’’ සතුව ගුවන් බලපත්‍ර දෙකක් තිබුණ බවයි. කෙසේ හෝ වේවා අවසානයේදී මිය ගොස් සිටින්නේ උතුරු කොරියානු නායකයාගේ සහෝදරයා බව මැලේසියාව විසින් සඳහන් කරන ලදී. එහෙත් මැලේසියාව මේ ගැන ප්‍රධාන චෝදනාව එල්ල කරනු ලබන්නේ උතුරු කොරියාවටයි. ඒ නිසාම සැකකරුවන් අත්අඩංගුවට ගැනීමට පවා මැලේසියාව එතරම් උන්දුවක් දැක්වූයේ නැත.

 

 ඝාතනයට අදාළව උතුරු කොරියානුවන් සිව් දෙනෙක් අත්අඩංගුවට ගැනීම සඳහා ජාත්‍යන්තර පොලිසිය විසින් රතු නිවේදනයක් නිකුත් කළත් මැලේසියාව සඳහන් කරනු ලැබුවේ ‘‘කිම්’’ ඝාතනය කරන ලද දිනයේ මෙම සැකකරුවන් ගුවන් තොටුපොලේ සිට පලා යන්නනට ඇති බවයි.

 

 පසුව මරණ පරීක්ෂකවරයා ගේ අනුමැතිය අනුව ‘‘කිම් ජොන්ග් නාම්’’ ගේ මෘත ශරීරය එරටට භාරදීමට මැලේසියාව විසින් තීරණය කරන ලදී. මැලේසියානු අගමැති නජිබ් රසාක් සඳහන් කළේ එතෙක් උතුරු කොරියාවෙන් පිටවීමට නොහැකිව සිටි මැලේසියානුවන් තිදෙනාට ඒ වෙනුවෙන් අවසරය ලැබෙන අතර මැලේසියාවේ සිටි උතුරු කොරියානුවන්ටත් එරටෙන් පිටවීමට අවසර ලැබෙන බවයි. කිම් ජොන්ග් නාම් ගේ ඝාතනයට සම්බන්ධව මැලේසියානු පොලිසියට අවශ්‍යව සිටින උතුරු කොරියානුවන් තිදෙනාද මේ අතර සිටින්නට හැකි බැව් මැලේසියානු පොලිසිය සඳහන් කරන ලදී.

 

 මේ අතර 2018 වසරේ අගෝස්තු මාසයේ 18 වැනි පැවැති අධිකරණ තීන්දුව අනුව උතුරු කොරියානු නායකයා ගේ සොහොයුරාගේ ඝාතනය සම්බන්ධයෙන් අත්අඩංගුවේ පසුවෙන සැකකාරියන් දෙදෙනාට එරෙහි නඩු විභාගයක් වෙනුවෙන් අවශ්‍ය ප්‍රබල සාක්ෂි ඇති බව මැලේසියානු අධිකරණය විසින් තීන්දු කරන ලදී.