"ඉදිරිය ගැන කියන්න බැහැ... වර්තමානයේ අද දවස සතුටින් ගතකරනවා..." සුන්දර නිළි හිමාලි - Photos ‍ - Himali Sayurangi - Hiru Gossip, Lanka Gossip | Hirugossip | Hiru Gossip | Hiru Fm Gossip | Hiru Gossip Official Web Site |Lanka Gossip

Jun

"ඉදිරිය ගැන කියන්න බැහැ... වර්තමානයේ අද දවස සතුටින් ගතකරනවා..." සුන්දර නිළි හිමාලි - Photos ‍

5 Views

" ....ඒ නිසාම එහි හඬන අවස්ථාවල ග්ලිසරින් ඕනෑ වුණේ නැහැ. මමත් මවක් වීම නිසා ඒ චරිතය හැඟීම්බරව කරන්නට මට පුළුවන් වුණා. ඒ සියුම් රංගනයට වෙන්න ඇති සම්මානය හිමි වුණේ..."

ජනප්‍රිය ඒ වගේම දක්ෂ රංගන ශිල්පිනියක් වන හිමාලි සති අන්ත පුවත්පතකට ලබාදී තිබූ සාකච්චාවකි මේ.

දිවිතුරා එක්ක ඉන්න ඔබට ඇයව වඩාත් සමීප බව අමුතුවෙන් කියන්න ඕනි නෑ. ඒ වගේම ඇය මෑතකදී සුනාමි චිත්‍රපටය වෙනුවෙන් සම්මානයට පාත්‍ර වුණා..

මේ ඒ ගැනත් කලාවේ තොරතුරු ගැනත් වූ කතා බහක්....

කොහොමද මේ දිනවල වැඩකටයුතු?

මේ දිනවල වැඩකටයුතු කෙරෙන්නේ අඩුවෙන්. දිවිතුරා රූගත කිරීම් සිදු කරනවා. ඊට අමතරව අලුත් ටෙලි නාට්‍යයක රූගත කිරීම් සිදු කරමින් සිටිනවා.

ළඟදී ඔබට සම්මානයක් ලැබුණා නේද? ඒ ගැනත් කතා කරමු?

ඔව්. සුනාමි චිත්‍රපටයේ රංගනය වෙනුවෙන් Ceylon International Film Festivalහි හොඳම සහාය නිළිය ලෙස සම්මානයට පාත්‍ර වුණා. එම උළෙලේම නිරංජනී ශන්මුගරාජාටත් හොඳම නිළියට හිමි සම්මානය ලැබුණා. එම සම්මාන උළෙලට සහභාගිවීමට නම් ලැබුණේ නැහැ.

ඔබ සම්මානිත වූ චරිතය ගැන කතා කළොත්?

මට හරිම කනගාටුයි කොවිඩ් වසංගතය නිසා සුනාමි චිත්‍රපටය ලංකාවේ ප්‍රේක්ෂකයන්ට හරිහැටි නරඹන්නට නොහැකි වීම පිළිබඳව. නරඹපු ප්‍රේක්ෂකයන් මේ චිත්‍රපටය හොඳ චිත්‍රපටයක් ලෙස අගය කළා. මම ඒ චරිතය රඟපාන විට මගේ දුවත් ඒ චිත්‍රපටයේ දරුවාගේ වයසේමයි. ඒ නිසා ඒ චරිතය මට ඉතාම සමීපව දැනුණා. ඒ නිසාම එහි හඬන අවස්ථාවල ග්ලිසරින් ඕනෑ වුණේ නැහැ. මමත් මවක් වීම නිසා ඒ චරිතය හැඟීම්බරව කරන්නට මට පුළුවන් වුණා. ඒ සියුම් රංගනයට වෙන්න ඇති සම්මානය හිමි වුණේ.

සිනමාව තුළ ඔබට තවත් යමක් කරන්න තිබුණා කියලා යම් පසුතැවීමක් ඇතිවන්නේ නැද්ද?

පසුගිය අවුරුදු කිහිපය තුළම කොවිඩ් වසංගතය ආදී විවිධ ගැටලු නිසා නිර්මාණ සිදු කෙරුණේ නැහැ. ආරාධනා ලැබුණු නිර්මාණ පවා අවලංගු වුණා. මේ ආර්ථිකය කඩාවැටීම සමඟ නිර්මාණ කෙරෙන එක නැවතත් ඇනහිටියා. ගොළු තාත්තා සහ සුනාමි යන චිත්‍රපට දෙක තුළින්ම මම සම්මානයට පාත්‍ර වුණා. සිනමාවට මගේ දායකත්වය බොහොම මදියි. තවත් අවස්ථා ලැබුණා නම් සිනමාව තුළ යමක් කරන්න තිබුණා කියලා මම සිතනවා.

රටේ තිබෙන තත්ත්වය සමඟ කලාකාරිනියක් විධියට ඔබ මුහුණ දෙන ගැටලු ගැන කතා කළොත්?

ඇත්තටම කිවහොත් සෑම වැඩක්ම ඇනහිටලා තිබෙන්නේ. නිවේදිකාවක් විධියට සහ වෙළෙඳ දැන්වීම්වල හඬකැවීම් ශිල්පිනියක් ලෙසත් මම කටයුතු කළා. නමුත් මේ වනවිට බොහෝ වැඩකටයුතු සිදු කෙරෙන්නේ නැහැ. අපි ව්‍යාපාරිකයෝ නොවෙයි, කලාවෙන් ජීවත් වන අය. මේ කාලය උදාවෙන්නට පෙර අපි හොඳට කාලා බීලා ඇඳලා සිටියා. කොවිඩ් වසංගතය සහ ඊට පසුව මේ සිදු වූ ආර්ථික කඩා වැටීමත් සමඟ අපි ඉතාම කනගාටුදායක තත්ත්වයකට මුහුණ දී තිබෙනවා. නිර්මාණ හදන්න නිෂ්පාදකවරු නැහැ. ව්‍යාපාරිකයෝ තමයි බොහෝ වෙලාවට නිෂ්පාදන කටයුතු කරන්නේ. ඔවුන්ගේ ව්‍යාපාර කටයුතු කඩා වැටුණු විට කොහොමද ඔවුන් ටෙලි නාට්‍ය නිෂ්පාදනය කරන්නේ.

නිවේදිකාවකට පුළුල් දැනුමක් සහ ස්ථානෝචිත ප්‍රඥාවක් තිබිය යුතුයි නේද?

ඔව් අනිවාර්යයෙන්ම. මට අනුව නම් නිවේදනය කියන එක රංගනයට වඩා බැරෑරුම්. අදටත් නිවේදන කටයුත්තක් තිබෙනවා නම් මම ඒකට සෑහෙන්න සූදානම් වෙනවා. මොකද කියන දේ මතකයෙන් කියන්න ඕනෑ. කොළයක් බලාගෙන කියවන්න බැහැ. අපි කතා කරන වචන ගැළපෙන්න ඕනෑ, අවස්ථාවට ගැළපෙන්න ඕනෑ. රඟපාන විට වැරදුණොත් Cut කියලා නැවත හරියට රඟපාන්න පුළුවන්. නමුත් නිවේදනයේ දී කතා කරන වචනයක් ආපසු ගන්න බැහැ. වචනයක් වැරදුණොත් ඒක මට ආයෙ හදන්න බැහැ.

ඔබ වැඩිපුර කැමැති නිවේදිකාවගේ භූමිකාවටද, එහෙමත් නැත්නම් රංගන ශිල්පිනිය කියන භූමිකාවටද?

මේ භූමිකා දෙකටම බොහොම කැමැතියි. මම මුලින්ම ක්ෂේත්‍රය තුළට පැමිණෙන්නේ නිවේදිකාවක් විධියටයි. මම කතා කරන විලාසයට කැමැති ශ්‍රාවකයන්ගෙන් මට විශාල ප්‍රතිචාර ලැබුණා. ඉන් පසුව තමයි රංගන ශිල්පිනියක් විධියට මම කටයුතු කිරීම ආරම්භ කළේ. ඒ සඳහාත් විශාල ප්‍රතිචාර ලැබුණා. මම දෙකටම ආසයි. නමුත් මම නිළියක් විධියට සම්මාන ලබාගෙන නමක් හදාගන්න පුළුවන් වුණා. නමුත් නිවේදිකාවක් විධියට මට දැන් ලැබෙන අවස්ථා අඩුවෙලා තිබෙනවා. ඒ නිසා මම ආසයි නැවත මගේ නිවේදන භූමිකාව වැඩිදියුණු කරගන්න.

ඉදිරි වැඩකටයුතු ගැන කතා කළොත්?

ඉදිරි වැඩකටයුතු ගැන කිසිම සැලැස්මක් නැහැ. ඉදිරියේදී නිර්මාණ සඳහා ආරාධනා කළොත් භාර ගන්නවා. චිත්‍රපට දෙකකම වැඩ අවලංගු වුණා. ඉදිරිය ගැන කියන්න බැහැ. වර්තමානයේ අද දවස සතුටින් ගත කරනවා.

කුශාන්ති අනුරාධා බණ්ඩාර

හදගැස්ම