2021 නොබෙල් සාම ත්‍යාගලාභී රුසියානු ජාතික දිමිත්‍රි මුරතොව්ට හිමි වූ නොබෙල් සාම ත්‍යාග පදක්කම ඩොලර් මිලියන 103.5ක වාර්තාගත මුදලකට වෙන්දේසි කර තිබෙනවා.

මේ සම්බන්ධයෙන් අදහස් දැක්වූ දිමිත්‍රි කියා සිටියේ තමන් කිසිසේත් මෙම නොබෙල් සාම පදක්කම මෙතරම් මුදලකට අලෙවි වේ යැයි අපේක්ෂා නොකළ බවයි.

යුක්රේන ළමා සරණාගතයින් වෙනුවෙන් මුදල් එකතු කිරීම සඳහා රුසියානු මාධ්‍යවේදී දිමිත්‍රි මුරතොව් විසින් වෙන්දේසි කළ නොබෙල් සාම ත්‍යාගය ඊ‍යේ රාත්‍රියේ මෙලෙස ඩොලර් මිලියන 103.5 කට අලෙවි වූයේ නොබෙල් සම්මාන වෙන්දේසි සඳහා වූ පැරණි වාර්තාව ද බිඳ දමමින්.

මෙම වෙන්දේසිය හැසිරවූ හෙරිටේජ් වෙන්දේසියේ ප්‍රකාශකයෙකු සඳහන් කළේ ගැනුම්කරුගේ අනන්‍යතාවය තහවුරු කිරීමට නොහැකි බවයි.

නමුත් ඔහු විදේශයක සිටින බවට ඉඟි පළ කළා.

කෙසේ වෙතත් මෙම වාර්තාගත ලංසුව තහවුරු කර ඇත්තේ ප්‍රොක්සි මගින් සිදු කරන මූල්‍ය ගනු ගනුදෙනුවක් හරහා බවත් ඔහු කියා සිටියා.

ජුනි 1 වෙනිදාට යෙදී තිබුණු ලෝක සරණාගත දිනයේදී අවසන් වූ සති 3කට ආසන්න වෙන්දේසියේ ලංසු තැබීමෙන් පසු සම්මුඛ සාකච්ඡාවකට එක්වූ මුරතොව් පැවසුවේ මෙම ක්‍රියාවලියට විශාල සහයෝගයක් ලැබෙනු ඇතැයි බලාපොරොත්තු වූ නමුත් එය මෙතරම් විශාල මුදලක් වනු ඇතැයි කිසි විටෙකත් අපේක්ෂා නොකළ බවයි.

මීට පෙර, නොබෙල් ත්‍යාග පදක්කමක් සඳහා වැඩිම මුදලක් ගෙවා ඇත්තේ 2014 වසරේදීයි.

2021 ඔක්තෝම්බර් මාසයේදී නොබෙල් සාම ත්‍යාගය සඳහා රන් පදක්කම පිරිනමන ලද මුරටොව්, රුසියානු ස්වාධීන පුවත්පතක් වන Novaya Gazeta ප්‍රකාශනයේ ප්‍රධාන කර්තෘවරයායි.

නිව් යෝර්ක්හි ටයිම්ස් චතුරස්‍රයේදී කැරට් 23 ක් වන නොබෙල් සාම ත්‍යාග රන් පදක්කම වෙන්දේසි කෙරුණු අතර ඒ හරහා ලද අරමුදල් සෘජුවම යුක්රේනයේ යුද්ධයෙන් අවතැන් වූ ළමයින්ට උපකාර කිරීම සඳහා යුනිසෙෆ් ආයතනය වෙත ලබා දෙන බව දිමිත්‍රී මුරතොව් පවසා සිටියා.

වෙන්දේසිය අවසන් වී ටික වේලාවක් ගතවන විට යුනිසෙෆ් ආයතනය පැවසුවේ එම අරමුදල් ඒ වන විටත් ඔවුන් වෙත ලැබී ඇති බවයි.