Aug
22
209 Views
නිදන්නට හැකිනම් දෙනෙත් තුළ
සෑබෑවන සුබ සිහිනයක් වී.....
ගැයෙන්නට හැකිනම් දොරින් දොර
ලොවම පුබූදන ගීතයක් වී.....
ශ්රී ලාංකේය සංගීත ක්ෂේත්රය සිය මියුරු, ගැඹුරු හඬින් අමරණීය කළ, ‘ජාතියේ යශෝරාවය’ ලෙස මුළු මහත් ජාතියේම ගෞරවාදරයට පාත්ර වූ ප්රවීණ ගායන ශිල්පිනී ආචාර්ය නන්දා මාලනිය ඊයේ පස්වරුවේ දැයෙන් සදහටම සමුගත්තා.
මියයන විට ඇය 82 වැනි වියේ පසුවූවා.
1943 අගෝස්තු 23 වන දින අලුත්ගම ලෙවන්දූවේදී මෙලොව එළිය දුටු ඇය, දශක ගණනාවක් මුළුල්ලේ මෙරට රසික හදවත් සිය අසමසම ගායන පෞරුෂයෙන් නැහැවූ මහා යුග පුරුෂවරියක් බඳු කලාකාරිනියකි.
එහිදී ටී.එන්. මාග්රට් පෙරේරා ගුරුවරියගේ මගපෙන්වීම මත ලංකා ගුවන් විදුලියේ කරුණාරත්න අබේසේකරයන්ගේ "ළමා මණ්ඩපය" වැඩසටහනට එක්වෙමින් "බුදු සාදු" ගීතය ගායනා කරමින් ඇය සිය සංගීත ගමන ආරම්භ කරනු ලැබුවා.
පසුව 1961 වසරේදී ශ්රී ලංකාවේ ප්රථම වර්ණ චිත්රපටය වූ "රන්මුතු දූව" චිත්රපටයේ පණ්ඩිත් අමරදේවයන්ගේ සංගීත අධ්යක්ෂණයෙන් නාරද දිසාසේකරයන් සමඟ "ගලන ගඟකි ජීවිතේ" ගීතය ගායනා කරමින් චිත්රපට පසුබිම් ගායනයට පිවිසි ඇය, එතැන් පටන් දශක ගණනාවක් පුරා හෙළ ගීත කෙත පෝෂණය කළා.
ඉන්දියාවේ භාත්ඛණ්ඩේ සංගීත විද්යාපීඨයෙන් ශාස්ත්රීය සංගීතය හදාරා විශාරද උපාධිය ලබාගත් ඇය, 'සත්යයේ ගීතය', 'පවන', 'හේමන්තයේදී', 'පෙම්බර ලංකා' වැනි අතිශය ජනප්රිය ඒකපුද්ගල ගීත ප්රසංග සහ ගීත ඇල්බම ගණනාවක් රටට දායාද කළ අතර, කුඩා දරුවන් වෙනුවෙන් "සින්දු හෝඩිය" ඇතුළු ළමා ගීත නිර්මාණය කිරීමටද ඇය පියවර ගත්තා.
ඇගේ විශිෂ්ට ගායන කෞශල්යය වෙනුවෙන් හොඳම ගායිකාවට හිමි සරසවිය සම්මාන 12ක් සහ ජනාධිපති සම්මාන 10ක් ඇතුළු ජාතික හා අන්තර්ජාතික සම්මාන රැසකින් පිදුම් ලබා තිබෙනවා.
දශක ගණනාවක් පුරා පරම්පරා ගණනාවකගේ දුක, සතුට, විරෝධය මෙන්ම ආදරයද තම ස්වරයෙන් ප්රතිරාවය කළ ඒ අසහාය හඬ සදහටම නිහඬ වීම සමස්ත ලාංකේය ජාතියටම කිසිදා පිරවිය නොහැකි අතිමහත් හිස්තැනක්.
ඇයගේ දේහය මේවන විට ඇය පදිංචි වෙලා හිටිය නාවල පාර, අංක 30, විජයභා මාවත, නන්දා මාලිනී සංගීත ආශ්රමයේ තබා තිබෙනවා.
දේහය අද හවස 3.30 දක්වා මහජන ගෞරව දැක්වීම සඳහා මෙලෙස තැන්පත් කර තිබෙනවා.
ඉන් අනතුරුව පස්වරුවේ ඇගේ අවසන් කැමැත්තට ගරු කරමින්, කිසිඳු නිල හෝ විශේෂ අවමංගල්ය උත්සවයකින් තොරව අවසන් කටයුතු බොරැල්ල පොදු සුසාන භූමියේදී සිදු කිරීමට නියමිත වනවා.
ජාතියේ යශෝරාවය
නන්දා මාලනිය ඔබට අමාමහ නිවන්සුව ලැබේවා !
Make a Comment
Make a Comment..
Follow Us
මෙන්න බලන්න තවත් ගොසිප්
Hot Gossip
Recent Gossip Post
Follow Us
නැගලා යන ගොසිප්
