අරගල බිම ආණ්ඩුවේ මර්දනකාරී කුමන්ත්‍රණ හස්තයන්ට නතු වීමේ තත්ත්වයන් සැලකිල්ලට ගනිමින් දිනූ ජයග්‍රහණ සහ එහි ගෞරවය රැක ගනිමින් අරගලයේ පළමු අදියර මේ මොහොතේ අවසන් කිරීමට උපක්‍රමිකව සහ තාර්කික තීරණයක් ගත යුතුව ඇති බවයි එහි දැක්වෙන්නේ.

මේ අතර අරගලයේ නිරත ජන අරගලයේ පුරවැසියෝ සංවිධානය අද එක්සත් ජාතීන්ගේ සංවිධානයේ කොළඹ පිහිටි කාර්යාලයට සන්දේශයක් භාර දුන්නා. ඒ අරගලකරුවන්ට පහරදීම සහ මර්ධනය කිරීම සම්බන්ධයෙන් ජාත්‍යන්තර මැදිහත්වීමක් සිදුකරන ලෙස ඉල්ලමින්.

මේ අතර, පොලීසිය නුගේගොඩ පිහිටි පෙරටුගාමී සමාජවාදී පක්ෂ කාර්යාලය අද උදෑසන 07.30ට පමණ පරීක්ෂාවට ලක් කර තිබුණා. එම පක්ෂයේ සංවිධායක ලේකම් දුමින්ද නාගමුව කියා සිටියේ අද පෙරවරුවේ සිවිල් ඇඳුමින් සැරසුණු පිරිසක් පැමිණ පොලිසියෙන් බව පවසා පක්ෂ කාර්යාලයට ඇතුලුවීමට උත්සහ කළ බවයි.

සෝදිසි වරෙන්තුවක් හෝ අවශ්‍ය කරන පුද්ගලයෙකුගේ නම සඳහන් කිරීමට අපොහොසත් වීම හේතුවෙන් එය වැළැක්වීමට එම පක්ෂ ක්‍රියාකාරීන් පියවර ගනු ලැබුවා.

කෙසේ වෙතත්, පසුව වරෙන්තුවක් සමඟ පොලිස් නිල ඇඳුමින් මිරිහාන අපරාධ විමර්ශන අංශයේ නිලධාරීන් කණ්ඩායමක් පැමිණ පෙරටුගාමී සමාජවාදී පක්ෂයේ කාර්යාලය පරීක්ෂාවට ලක් කර තිබෙනවා.

මේ අතර ඊයේ අත්අඩංගුවට ගත්, පොල්දූව මංසන්ධියේ පැවති විරෝධතාවය මෙහෙයවූ බවට චෝදනා එල්ල වූ සමාජ මාධ්‍ය ක්‍රියාකාරිකයෙකු වන පැතුම් කර්නර් ලබන 04 වැනිදා දක්වා රක්ෂිත බන්ධනාගාර ගත කළා. ඒ අද ඔහු කොලඹ අතිරේක මහෙස්ත්‍රාත් හමුවට ඉදිරිපත් කිරීමෙන් අනතුරුවයි.

එසේම, පසුගිය 09 වැනිදා කොටුව ජනාධිපති මන්දිරයට ඇතුළු වී ජනාධිපතිවරයාගේ නිල ධජය ඇඳ ඇතිරිල්ලකට භාවිත කළ බවට චෝදනා එල්ලවූ සමගි ජනබලවේගයේ හිටපු වරාය වෘත්තීය සමිති නායකයෙකු වන උදේනි කළුතන්ත්‍රි පොලීසිය අද අත්අඩංගුවට ගත්තා.

මේ අතර ජනාධිපති මන්දිරයට ඇතුළු වී එහි දේපලවලට හානි සිදුකිරීම ඇතුළු චෝදනා මත මේ දක්වා පුද්ගලයන් 10 දෙනකු අත්අඩංගුවට ගෙන ඇති අතර අරලිය ගහ මන්දිරයට ඇතුළු වී කලහකාරීව හැසිරීම සහ එම දේපල සොරාගැනීම මෙන්ම හානි සිදු කිරීම ඇතුලු චෝදනා යටතේ තුන් දෙනකු අත්අඩංගුවට ගෙන තිබෙනවා.

මේ අතර, ජනාධිපති මන්දිරයේ තිබී අරගලකරුවන් විසින් කොටුව පොලිස් ස්ථානයට භාර දුන් රුපියල් එක්කෝටි හැත්තෑ අට ලක්ෂයක මුදල අද කොටුව පොලිසිය මගින් අද කොළඹ කොටුව මහේස්ත්‍රාත් අධිකරණයට බාරදෙනු ලැබුවා.

එම මුදල් අධිකරණයට ඉදිරිපත් කිරීමට මෙතරම් ප්‍රමාද වීම සම්බන්ධයෙන් එහිදී කොටුව මහේස්ත්‍රාත්වරයා පොලිස්පතිවරයාගෙන් වාර්තාවක් කැදවූ බවයි හිරු අධිකරණ වාර්තාකරු සදහන් කළේ.

මේ අතර ගාලුමුවදොර බණ්ඩාරණායක පිළිරුව පිහිටි ස්ථානයේ සිට මීටර් 50ක සීමාවට කිසිදු පුද්ගලයකුට ඇතුළු වීම වළක්වාලමින් නිකුත් කර ඇති නියෝගය ඉවත් කරන ලෙස ඉල්ලා ගොනු කර තිබෙන ඉල්ලීමක් සම්බන්ධයෙන් විරෝධතා ගොනුකරන ලෙස කොටුව මහෙස්ත්‍රාත් අධිකරණය අද කොටුව පොලිසියට නියෝගයක්ද නිකුත් කළා.

මේ අතර, අධිනීතිඥ මනෝලි ජිනදාස, අද හිරු හාර්ඩ් ටෝක් විශේෂාංගය සමඟ එක්ව අදහස් දැක්වුවා.

නීතිඥවරුන්ට එල්ල වන චෝදනා ගැන ඇය දුන්නෙ මෙවන් පිළිතුරක්. (වීඩියෝව බලන්න)