දෙවියන් දඬුවම් දී මරණයට පත්වූ බව කියන වීඩියෝව මෙන්න - වරද ගෙරි මස් කෑම ලු - Mawanella - Hiru Gossip, Lanka Gossip | Hirugossip | Hiru Gossip | Hiru Fm Gossip | Hiru Gossip Official Web Site |Lanka Gossip

Jun

දෙවියන් දඬුවම් දී මරණයට පත්වූ බව කියන වීඩියෝව මෙන්න - වරද ගෙරි මස් කෑම ලු

3 Views

හරක් මස් අනුභව කර නිවසට පැමිණීම නිසා දේව දඬුවමක් ලෙස දින 28 ක් කාමරයක දමා සිරකර තිබීම හේතුවෙන් 31 හැවිරිදි තරුණයෙකු මියගිය බවට එම තරුණයාගේ ඥාතීන් චෝදනා කරනවා.

මෙම සිද්ධිය වාර්තා වන්නේ මාවනැල්ල - වෑගන්තලේ - පීල්ලපිටිය ප්‍රදේශයෙන්.

ඥාතින් ප්‍රකාශ කරන පරිදි මෙම තරුණයා තම මිතුරන් සමඟ සාදයකට ගොස් එහිදී හරක් මස් අනුභව කර තිබෙනවා. පසුව, ඔහු නිවසට පැමිණ මේ පිළිබඳව තම දෙමව්පියන් දැනුවත් කර ඇති අතර, එහිදී ඔවුන් සඳහන් කර ඇත්තේ හරක් මස් අනුභව කිරීම නිසා නිවසට කිලි වදින බවයි.

දේවාලයක සේවය කරන ඥාති පුත්‍රයෙකු ඔවුන්ගේ නිවසෙහි නැවතී සිටින දෙමව්පියන් මෙම සිද්ධිය පිළිබඳව ඔහු දැනුවත් කර තිබෙනවා.

එහිදී දේවාලයේ සේවය කරන පුද්ගලයා ප්‍රකාශ කර ඇත්තේ හරක් මස් අනුභව කිරීම නිසා දේව දඬුවමක් ලෙස මෙම තරුණයා දින 28 ක් කිසිදු ආහාරයක් නොගෙන නිවසෙන් වෙන් වූ කාමරයක රඳවා තැබිය යුතු බවයි. ඒ අනුව මියගිය තරුණයා නිවසින් වෙන් කරන ලද කුඩා කාමරයක සිරකර තිබෙනවා.

මියගිය තරුණයාගේ නැන්දා කෙනෙකු හිරු ප්‍රවෘත්ති අංශය අදහස් දක්වමින් සඳහන් කළේ තමන් ඇතුළු පවුලේ කිහිපදෙනෙකු අවස්ථා කිහිපයකදී තරුණයා මුදා හරින ලෙස දෙමව්පියන්ගෙන් ඉල්ලා සිටි බවයි. එහෙත්, මෙය දේව දඬුවමක් බව ප්‍රකාශ කරමින් ඔවුන් එය සිදුකර නැහැ.

මෙම තරුණයා ඊයේ රාත්‍රියේ මියගොස් ඇති අතර මියගිය තරුණයාගේ නැන්දා කෙනෙකු වන කේ. කසුමාවතී ඒ පිළිබඳව අප වෙත කරුණු හෙළි කළා.

මේ අතර, පශ්චාත් මරණ පරීක්ෂණය පැවැත්වීම සඳහා මියගිය තරුණයාගේ මෘත ශරීරය මාවනැල්ල රෝහලට යොමුකර තිබෙනවා.

කෙසේ වෙතත්, මාවනැල්ල පොලිසිය සඳහන් කළේ මියගිය තරුණයාට මීට සති දෙකකට පමණ පෙර බයිපාස් සැත්කමක් සිදුකර ඇති බවයි.

එම සැත්කමෙන් මතුවූ ආසාත්මිකතාවක් සඳහා සිංහල වෙදකම් සිදුකිරීමට යාමේදී තරුණයා මියගොස් ඇති බවට මූලික පරීක්ෂණවලදී අනාවරණ වන බවයි මාවනැල්ල පොලිසියේ ප්‍රකාශකයෙකු හිරු ප්‍රවෘත්ති අංශයට සඳහන් කළේ.