1964දී තිස්ස ගුණවර්ධනගේ ‘රන්තෙලී’ නාට්‍යයට තමයි මම රංගනයෙන් දායක වුණේ. 69දී ටෙනිසන් කුරේ සමග වේදිකා නාට්‍යයක රංගනයට පැමිණියා. ඒ නාට්‍යය ‘එයා මළා’. සුනේත්‍රා රාජකරුණානායක තමයි එහි ප්‍රධාන චරිතයට රගපෑවේ. සුනේත්‍රා බණ්ඩාරනායක මහත්මිය ‘දෝණි’ නමින් වේදිකා නාට්‍යයක් කළා. එහි ප්‍රධාන චරිතයටත් සුනේත්‍රා රාජකරුණානායක රංගනයෙන් දායක වුණා. මමත් සුළු චරිතයකින් රංගන දායකත්වය ලබා දුන්නා. ‘නර ලොවට වැඩක්’ නමින් වේදිකා නාට්‍යයක් නිර්මාණය වුණා. එහි ප්‍රධාන චරිතයට දායක වුණේ මම. කාලිංග උභයවංශ තමයි එය අධ්‍යක්ෂණය කළේ. ‘අපායේ තත්පර එක්දහස් අටසීය’, ‘භාණ්ඩාගාරය හිස්’ වැනි නාට්‍ය කරනගෙන යනකොට මට හිතුණා අභිරූපණ කළ යුතුයි කියලා. 1973දී එයට යොමු වුණා. චන්ද්‍රසිරි කොඩිතුවක්කු, ජයසේකර අපොන්සු සමගින් සංගීත කටයුතු කළා. වසන්ත ඔබේසේකර, ටයිටස් තොටවත්ත, සුගතපාල සෙනරත් යාපා, විජය ධර්මශ්‍රී, ඩීබී නිහාල්සිංහ, ඩබ්ලිව් ඩී අමරදේව, ෂෙල්ටන් ප්‍රේමරත්න, ජයතිස්ස අලහකෝන් වැනි අයගේ ඇසුර ලැබුණා. පසුව 1973 ‘දියමන්ති’ චිත්‍රපටයට සම්බන්ධ වුණා. ‘පසමිතුරෝ’, ‘සුද්දා’, ‘වදුල’ වැනි චිත්‍රපටවල ප්‍රධාන චරිතයට දායක වුණා. සිනමාවේ සංධිස්ථානයක් වූ ‘මලට නොයෙන බඹරු’ චිත්‍රපටයටත් දායක වුණා. ෂෙල්ටන් පයාගලගේ නිර්මාණයක්. ඒ සමග වසර තුනක පමණ කාලයක් කටයුතු කරන්න වුණා. ‘ගොලු මුහුද’ වැනි චිත්‍රපටවලට ලොකු කාලයක් ලබාදෙන්න සිද්ධ වුණා. මේ කටයුතු කරන ගමන් ටෙලිනාට්‍ය වලටත් එනවා. ‘රූපවාහිනී පියසටහන්’, ‘රට රටවල කතා’, ‘රූපවාහිනී කතන්දර පිටුව’, ‘මැජික් සීයා’ ආදියට සම්බන්ධ වුණා. ‘මැජික් සීයා’ ලංකාවේ ප්‍රථම සජීවීකරණ නාට්‍යය. පසුව ‘පුංචි රාළ’ නමින් සජීවීකරණ නාට්‍යයක් කළා.

1974 එම්.කේ රොක්සාමි මගේ ‘වඩු වැඩෙන් දිවි රකීන’ ගීතය කළා. ස්ටැන්ලි ප්‍රනාන්දු ගුවන්විදුලි සංස්ථාවට දුන්නා. ‘බෝඩිම’ නාට්‍යයටත් ඒ ගීතය කළා. එය ලංකාවේ ප්‍රථම සජීවීකරණ ගීතය. ස්ටැන්ලි උමාර් ඔරියන්ටල් ලෙසින් ඒ ගීතය කළා. වඩු වැඩෙන් ගීතය ශෛලීන් පහකට කර තිබෙනවා. රොක්සාමි මේ ගීතය කළේ කර්ණාටක ශෛලියට. ස්ටැන්ලි ප්‍රනාන්දු කළේ වෙස්ටන් ශෛලියකට. බෝඩිම නාට්‍යයට කළේ කැලිප්සෝ ශෛලියට. අපේ පුතාලා රෙගේ ශෛලියෙන් මේ ගීතය කළා.

අද කලාව ගැන හිතෙද්දි දුකයි. ඒ කාලේ හිටපු ප්‍රවීණ සිනමාවේදීන් සමග කටයුතු කළා. අද එවැනි මනුස්සකම් කලාකරුවන් තුළ නැහැ. මම රාජ්‍ය සංගීත කණ්ඩායම සමග ගායනා කරන්න යනවා.

සාරධර්ම පොත් පහක් මම රචනා කර තිබෙනවා.

මේ වන විට සීඩිපට දොළහක් කර තිබෙනවා. මේ සියල්ල නිෂ්පාදනය කළේ විවිධ සමාගම් විසින්. මාරිම්බා, ග්ලැක්සිස්, සන්ෆ්ලවර්ස් එක්ක මම සංගීත වලට ගියා. නමුත් රාජ්‍ය සංගීත කණ්ඩායම හොඳ මට්ටමක තිබෙනවා. අනුෂා ගෝකුල මැතිණිය මේ මොහොතේ මතක් කළ යුතුමයි. ඇය පැරණි කලාකරුවන් වෙනුවෙන් සැලකුම් ලබාදෙනවා. මට භාෂා කිහිපයකින් ගීත ගායනා කරන්න හැකියාව තිබෙනවා. දරුවන් වෙනුවෙන් තමයි මම ගොඩක් නිර්මාණ කළේ.

අද ළමයින් වෙනුවෙන් කාල වේලාවක් ලබාගන්න ගන්න විදිහක් නැති තත්ත්වයක් ඇතිව තිබෙන්නේ. ඒ ගැන කණගාටුවක් තිබෙනවා. අද දරුවන්ට එදා තිබුණ රැකවරණය නැහැ. අධ්‍යාපනයේත් තමන් ගැන කියලා දෙන පසුබිමක් නැහැ. ලංකාව ගැන දන්න මිනිස්සු රටට ඉතිහාසයක් නෑ වගේ යන්නේ. පොඩිහිටියෝ වැඩිහිටියෝ වෙලා රියලිටි ඇතුළේ කටයුතු කරනවා. කිසිම කෙනෙක්ට දරුවන් ගැන හැඟීමක් නෑ. ලෙනින් මහත්තයා හොඳම දේ දරුවන්ට කියලා කිව්වට අද එහෙම වෙන්නෙ නැහැ. ඉස්සර හැමෝගෙම එකමුතුකම තිබුණා. සුන්දර මිනිසුන් හිටියා. ඒත් අද එහෙම මිනිසුන් දකින්නේ හරි අඩුවෙන්.

චිත්‍රපට, නාට්‍ය සංගීතයට කළ සේවය වෙනුවෙන් කලාභූෂණ සම්මානය හිමිවුණා. ඒ ගැන මට තියෙන්නේ සතුටක්.