බන්ධනාගාරයෙන් මියගියා යැයි කියූ කීර්තිසේන, හදිසියේම පණපිටින් තමන්ගේ මළගෙදරටම පැමිණීමෙන් , ගල්ගමුව ම කැළඹෙයි.. - News Artical - Hiru Gossip, Lanka Gossip | Hirugossip | Hiru Gossip | Hiru Fm Gossip | Hiru Gossip Official Web Site |Lanka Gossip

Aug

බන්ධනාගාරයෙන් මියගියා යැයි කියූ කීර්තිසේන, හදිසියේම පණපිටින් තමන්ගේ මළගෙදරටම පැමිණීමෙන් , ගල්ගමුව ම කැළඹෙයි..

313 Views

මියගිය බවට පොලිසිය විසින් නිල වශයෙන් දැනුම් දී, අවමංගල්‍ය කටයුතු සඳහා සියලු කටයුතු ද සූදානම් වෙමින් තිබියදී,

මියගියා යැයි පැවසුණු පුද්ගලයා සූදානම් කළ තමන්ගේම මළගෙදරට පණපිටින් පැමිණි අපූරු මෙන්ම මවිතයට පත් කරන සිදුවීමක් ගල්ගමුව, කොහොබන්කුලම ගම්මානයෙන් අහන්න ලැබෙනවා.

මෙසේ සිය නිවසට අද (24) දින හදිසියේම පැමිණ ඇත්තේ ගල්ගමුව, කොහොබන්කුලම පදිංචි ඩී. එම්. කීර්තිසේන නමැති අයෙකුයි.

වාරියපොල බන්ධනාගාරයේ රඳවා සිටි ඔහු, බන්ධනාගාරය තුළදී මියගොස් ඇති බවට නාන්නේරිය පොලිසිය මගින් ඔහුගේ ඥාතීන්ට දැනුම් දී තිබෙනවා.

මෙම පණිවිඩයත් සමඟ දැඩි කම්පනයට හා ශෝකයට පත් ඥාතීන් සහ ගම්වාසීන් එකමුතුව කඩිනමින් අවමංගල්‍ය කටයුතු සංවිධානය කිරීමට පියවර ගෙන ඇති අතර,

ගම්මානය පුරා අවමංගල්‍ය බැනර් සවි කර, මළගෙදරට අවශ්‍ය හට් ආදියද සවි කර , ආදාහන කටයුතු සඳහා සියලු කටයුතු සූදානම් කරමින් සිටි මොහොතක, සැවොම මවිතයට පත් කරමින් කීර්තිසේන පණපිටින් නිවසට පැමිණ තිබෙනවා.

මෙම සිදුවීමත් සමඟ බන්ධනාගාර සහ පොලිස් බලධාරීන්ගේ තොරතුරු හුවමාරුවේ පවතින බරපතල අඩුපාඩු හා නොසැලකිලිමත්කම පිළිබඳව ප්‍රදේශවාසීන් දැඩි විරෝධය පළ කර ඇති අතර, සිදුවූ මෙම විශාල තොරතුරු ව්‍යාකූලත්වය සහ බරපතල අත්වැරැද්ද සම්බන්ධයෙන් වගකිවයුතු අංශ මගින් වහාම විමර්ශනයක් පැවැත්විය යුතු බවයි ගම්වාසීහු පවසන්නේ.