මේවා බොන්න පුරුදු වෙන්න.. එය ඔබේ නීරෝගීබවටත් හේතුවක් වේවි.. කිරිපිටි වෙනුවට මෙන්න හොඳ ආදේශක 5ක්.. - Health Tips - Hiru Gossip, Lanka Gossip | Hirugossip | Hiru Gossip | Hiru Fm Gossip | Hiru Gossip Official Web Site |Lanka Gossip

May

මේවා බොන්න පුරුදු වෙන්න.. එය ඔබේ නීරෝගීබවටත් හේතුවක් වේවි.. කිරිපිටි වෙනුවට මෙන්න හොඳ ආදේශක 5ක්..

13 Views

අද වෙනකොට වෙළඳපොලේ කිරිපිටි මිල ගණන් බොහොම වැඩියි..

අපි කවුරුත් පුරුද්දට, ඇබ්බැහිකමට කිරිපිටි බිව්වත් එයින් ලැබෙන යහපත් ප්‍රතිඵලවලට වඩා අයහපත් ප්‍රතිඵල ගොඩක් වැඩියි..

මේක ඇත්තටම පිටිකිරි ගැන මානසික ඇබ්බැහියක්..

ඒ ඇබ්බැහියෙන් අපි ටිකෙන් ටික ඈත් වෙන්න බලන්න ඕන... ඉතින් කිරිපිටි වීදුරුවට තිත තියලා බොහොම පහසුවෙන් හදාගන්න පුළුවන් මේ සෞඛ්‍ය සම්පන්න පාන වර්ග ටිකක් ගැන තමයි මේ කියන්න යන්නේ...

ඔයා දැනටමත් පොඩි පොඩි ලෙඩ දුක්වලින් පීඩා විඳිනවා නම්, මේ පාන වර්ගවලින් ඒ ලෙඩ දුක් සමහරවිට නැත්තටම නැති වෙලා යාවි..

- සෝයා කිරි

අවශ්‍ය ද්‍රව්‍ය :-
-සෝයා ඇට කෝප්ප 01 ක්
-වතුර කෝප්ප 03, 1/2 ක්
සාදාගන්නා අන්දම :-
සෝයා ඇට පැය 08ක් පමණ පෙඟෙන්න දමා ඉන්පසු සෝයා ඇට අතින් පොඩි කරමින් පොතු ටික අයින් කරගන්න. කිහිපවරක් මෙසේ අතින් පොඩි කරමින් සෝදනකොට විට පොතු පහසුවෙන්ම ඉවත් වෙනවා. ඉන්පසු මෙය බ්ලෙන්ඩර් එකට දමා වතුර කෝප්ප 01ක් එක්කර හොඳින් බ්ලෙන්ඩ් කරගන්න. දැන් මෙය කෙලින්ම භාජනයකට දමා ඉතුරු වතුර ටිකත් එක්කර ලිපේ තියලා හොඳින් හැඳිගාන්න මෙය උතුරනකොට උඩට ඉවත් වන කොටස් හැන්දකින් ඉවත් කරගන්න. ඉන්පසු මෙය ලිපෙන් බා නිවෙන්න තබා පිරිසිදු කපු රෙදි කැබැල්ලකින් පෙරාගන්න. හොඳට නිවුනු පසු බෝතල් වලට එක්කර ෆ්‍රිජ් එකේ දමා අවශ්‍ය වෙලාවට රැගෙන සීනි එක්කර පානය කරන්න.

-මුං ඇට කිරි

අවශ්‍ය ද්‍රව්‍ය :-
-මුං ඇට කෝප්ප 1/4 ක්
-සුදුළූණු බික් 03 ක්
-පොල්කිරි කෝප්ප 01 ක්
-ලුණු ස්වල්පයක්
සාදාගන්නා අන්දම :-
මුං ඇට ටික රැයක් පෙඟෙන්න තියන්න. ඉන්පසු මෙයට වතුර එක්කර තම්බාගන්න. සුදුළූණු ටිකත් එක්කරගන්න. මුං ඇට හොඳින් තැම්බුන පසු වතුර ඉවත්කර වෙනම භාජනයකට දමාගන්න. දැන් මුං ඇට ටික නැවත ලිපේ තිබා පොල්කිරි එකතු කරන්න.‍ රස අනුව ලුණු එක්කර නටවාගන්න. ඉන්පසු ලිපෙන් බා නිවෙන්නට තබන්න.
නිවුන පසු හොඳින් බ්ලෙන්ඩ් කර පානය කරන්න.

-තල ඇට කිරි

අවශ්‍ය ද්‍රව්‍ය :-
-තල ඇට කෝප්ප 1/4 ක්
- රටඉඳි 06 ක්
-වතුර කෝප්ප 1,1/2 ක්
සාදාගන්නා අන්දම :-

පළමුව තල ඇට ටික කබලේ බැදගන්න. ඉන්පසු මෙය බ්ලෙන්ඩර් එකට දමා එයට ඇට ඉවත් කරගත් රට ඉඳි සහ වතුර ටික ද එක්කරගන්න. දැන් මෙය විනාඩි 05ක් පමණ හොඳින් බ්ලෙන්ඩ් කර පිරිසිදු කපු රෙදි කැබැල්ලක ආධාරයෙන් පෙරාගන්න. දැන් මෙය වීදුරුවකට දමා උඩින් රටඉඳි කැබලි කිහිපයක් එක්කර බීමට ගන්න.

- සහල් කිරි

අවශ්‍ය ද්‍රව්‍ය :-
-හාල් කෝප්ප 01 ක්
-අවශ්‍ය ප්‍රමාණයට වතුර
-ලුණු ස්වල්පයක්
-සීනි ස්වල්පයක්
සාදාගන්නා අන්දම :-

හාල් ටික සෝදා වතුර එක්කර ලිපේ තබන්න.
දැන් මෙම බත් ටික මැන බ්ලෙන්ඩර් එකට දමා එයට වතුර කෝප්ප 1,1/4ක් පමණ එක්කරගන්න. රස අනුව ලුණු යොදා හොඳින් බ්ලෙන්ඩ් කරගන්න. පිරිසිදු රෙදි කැබැල්ලක් ගෙන මෙය පෙරා රස අනුව සීනි එක්කර පානය කරන්න.

- ආමන්ඩ් කිරි

අවශ්‍ය ද්‍රව්‍ය :-
-ආමන්ඩ් කෝප්ප 01 ක්
-කූල් වතුර කෝප්ප 02 ක්
- වතුර කෝප්ප 04 ක්
-වැනිලා ස්වල්පයක්
සාදාගන්නා අන්දම :-
ආමන්ඩ් ඇට ටික සීතල වතුර භාජනයකට දමා රැයක් පෙඟෙන්න තබන්න. ඉන්පසු මෙම වතුර ටික පෙරා හොඳින් සෝදා බ්ලෙන්ඩර් එකට දමාගන්න. මෙයට වතුර කෝප්ප 04ක් එක්කර වැනිලා දමා කෑලි නැතිවෙනතුරු හොඳින් බ්ලෙන්ඩ් කරගන්න. දැන් පිරිසිදු රෙදි කැබැල්ලක් ගෙන පෙරා මිරිකා කිරි ටික ගන්න. මෙය ෆ්‍රිජ් එකේ දමා පානය කරන්න.

අන්තර්ජාලය ඇසුරෙන්..