"නීතිඥ යුවළගේ ඝාතනය පිටුපස සිටි සහෝදරයෝ දෙන්නාත් කොටු වෙයි" - අකුරේගොඩ ඝාතනයේ අලුත්ම හෙළිදරව්ව මෙන්න.. - Police Case - Hiru Gossip, Lanka Gossip | Hirugossip | Hiru Gossip | Hiru Fm Gossip | Hiru Gossip Official Web Site |Lanka Gossip

Feb

"නීතිඥ යුවළගේ ඝාතනය පිටුපස සිටි සහෝදරයෝ දෙන්නාත් කොටු වෙයි" - අකුරේගොඩ ඝාතනයේ අලුත්ම හෙළිදරව්ව මෙන්න..

8,384 Views

මුළු රටම කම්පනයට පත් කළ අකුරේගොඩ නීතිඥ යුවළගේ ඝාතන සිද්ධිය සම්බන්ධයෙන් අතිශය තීරණාත්මක තොරතුරු රැසක් බස්නාහිර පළාත් දකුණු අපරාධ කොට්ඨාශය මගින් අනාවරණය කරගෙන තිබෙනවා.

නීතිඥවරයා සහ ඔහුගේ බිරිඳ ඝාතනය කිරීමට සහාය දුන් බවට සැකකෙරෙන, වයස අවුරුදු 20 සහ 24 පසුවන සහෝදරයන් දෙදෙනෙකු ඇතුළු පුද්ගලයින් සිව්දෙනෙකු මේ වන විට පොලිස් අත්අඩංගුවට පත්ව ඇති බවයි වාර්තා වන්නේ.

පොලිසිය සිදුකළ මූලික විමර්ශනවලදී හෙළි වී ඇත්තේ, මෙම අහිංසක යුවළ ඝාතනය කිරීමට යොදාගත් ගිනිඅවි දෙක අදාළ ඝාතකයන් වෙත ලබාදී ඇත්තේ අත්අඩංගුවට ගත් සහෝදරයන් දෙදෙනා විසින් බවයි.

ඔවුන් එම ගිනිඅවි ඉතා රහසිගතව ප්‍රවාහනය කර ඝාතකයන් අතට පත් කර ඇති බවටයි පොලිසිය දැන් සැක කරන්නේ.

මෙම ම්ලේච්ඡ අපරාධය සිදු කිරීම සඳහා සැකකරුවන් විසින් භාවිතා කරන ලද මෝටර් රථය ද පොලිස් භාරයට ගැනීමට විමර්ශන නිලධාරීන් සමත්ව තිබෙනවා.

කොට්ටාව ප්‍රදේශයේ සිදුකළ විශේෂ වැටලීමකදී මෙම පිරිස සහ වාහනය කොටු කරගෙන ඇති අතර, මේ වන විට ඔවුන්ගෙන් දීර්ඝ ලෙස ප්‍රශ්න කිරීම් ආරම්භ කර තිබේ.

නීතිඥ යුවළ ඝාතනය කිරීම පිටුපස සිටින සැබෑ මහමොළකරු කවුද සහ මේ තරුණ සහෝදරයන් මෙම අපරාධයට සම්බන්ධ වූයේ මුදලට ද නැතිනම් වෙනත් හේතුවක් මතද යන්න සොයා බැලීම සඳහා පොලිසිය වැඩිදුර පරීක්ෂණ පවත්වයි.