මෙම සිද්ධිය සම්බන්ධයෙන් නිවැසියන් වැලිකන්ද පොලිසියට පැමිණිල්ලක් ද ඉදිරිපත් කර ඇති බව අප වාර්තාකරු පැවසීය.
"ගෑස් ලිප පත්තු කරලා තියෙනවා. පත්තු වෙලා නෑ. ඊට පස්සේ ගිනිපෙට්ටිය හොයාගෙන ගිනිකූරක් ගහලා. ඊට පස්සේ ගිනි අරගෙන තියෙන්නේ. එච්චරයි මම දන්නේ. වැලිකන්දට තමා එක්කගෙන ඇවිත් තිබ්බේ. ඊට පස්සේ පොළොන්නරුවට එව්වා. පොළොන්නරුව ඉස්පිරිතාලෙට තමයි මම ගියේ ලෙඩා බලන්න. ඊට පස්සේ තාත්තේ ගෑස් ලිපට පිච්චුණා කිව්වා මට. වෙන මුකුත් කිව්වේ නෑ අප්පා මගෙ දුව. මූණට ඇවිලිලා තිබුණා."
නිවසේ මුළුතැන් ගෙයි තිබූ ගෑස් උදුන දැල්වීමට යාමේදී එය දැල් වී නොමැති නිසා ගිනිකූරක් මගින් එය දැල්වීමට උත්සාහ දැරීමත් සමග ගෑස් සිලින්ඩරය පුපුරා ගොස් මෙම අනතුර සිදුව ඇති බව පොලිස් පරීක්ෂණවලින් හෙළිවී ඇතැයි අප වාර්තාකරු පැවසීය.
අප වාර්තාකරු කළ විමසීමකදී වැලිකන්ද පොලිස් ස්ථානාධිපති පොලිස් පරීක්ෂක සමන්ත රත්නායක මහතා සඳහන් කර ඇත්තේ, මේ සම්බන්ධ විමර්ශන අවසන් කර ඊයේ (නොවැ. 26) දින අදාළ තරුණියගේ අවසන් කටයුතු සිදු කිරීම සඳහා පවුලේ ඥාතීන්ට දේහය භාරදුන් බව ය.
මේ සම්බන්ධයෙන් mawbima කළ විමසීමකදී වැලිකන්ද පොලිසිය සඳහන් කළේ, අදාළ තරුණිය ජීවිතක්ෂයට පත්ව ඇත්තේ, ගෑස් කාන්දුවකින් සිදුවූ පිපිරීමකින් බව අනාවරණය වූ බව ය.
කෙසේ නමුත් ඊයේ රාත්රියේ පොලිස් මාධ්ය ප්රකාශක කාර්යාලය නිවේදනයක් නිකුත් කරමින් සඳහන් කළේ, අදාළ තරුණිය ජීවිතක්ෂයට පත්ව ඇත්තේ ගෑස් කාන්දුවක් හේතුවෙන් සිදු වූ පිපිරීමකින් නොවන බව ය.
සිරුරට ගිනි තබා ගැනීමක් හේතුවෙන් මෙම මරණය සිදුව ඇති බව විමර්ශනවලදී අනාවරණය වී ඇති බව එම කාර්යාලය අදාළ නිවේදනයේ සඳහන් කර තිබිණි.
මෙම සිද්ධිය සම්බන්ධයෙන් අපරාධ පරීක්ෂණ ස්ථාන පරීක්ෂණ නිලධාරීන් විසින් සිදු කරන ලද විමර්ශනයේදී ගෑස් ලිප හෝ ගෑස් සිලින්ඩරය පුපුරා යාමක් සම්බන්ධයෙන් වාර්තා කර නොමැති බව ද පොලිස් මාධ්ය ප්රකාශක කාර්යාලය නිවේදනය කර තිබිණි.
පසුගිය 13 වන දා මෙම අනතුර සිදු වී ඇති අතර අදාළ තරුණිය ඉන් පිළිස්සුම් තුවාල ලැබීම හේතුවෙන් වැලිකන්ද රෝහලට ඇතුළත් කර ඇත.
අප වාර්තාකරු සහන් කළේ, අනතුර සිදුවන අවස්ථාවේ එම නිවසේ වෙනත් කිසිවෙකුත් නොසිට ඇති අතර අසල්වාසීන් පැමිණ ගෑස් ලිපෙන් මුළුතැන්ගෙයි පුරා නැඟුණු ගිනි නිවා ඇයව වැලිකන්ද ප්රාදේශීය රෝහලට ඇතුළත් කර තිබූ බව ය.
ඉන් පසුව පොළොන්නරුව රෝහලට ත් පසුව ජාතික රෝහලට ත් ඇතුළත් කර දින 12ක් ප්රතිකාර ලබමින් සිට ඇති ඇය පසුගිය 24 වන දා ජීවිතක්ෂයට පත්ව තිබුණු බව පොලිස් මාධ්ය ප්රකාශක කාර්යාලය පැවසීය.
කෙසේ වෙතත්, mawbima.lk වෙබ් අඩවිය කළ විමසීමකදී වැලිකන්ද පොලිසිය සඳහන් කළේ, නොවැ. 25 වන දා අදාළ තරුණිය ජීවිතක්ෂයට පත්ව තිබුණු බව ය.
අප වාර්තාකරු සඳහන් කළේ, මිය ගිය තරුණියගේ අවසන් කටයුතු ඊයේ (නොවැ. 26) දින පැළෑටියාව පොදු සුසාන භූමියේදී සිදු කළ බව ය.
අනතුරෙන් මියගොස් ඇත්තේ වැලිකන්ද, සඳුන්පිටිය අංක 68 ලිපිනයේ පදිංචිව සිටි බී.ජී. අයේශා කුමුදුනී නම් 19 හැවිරිදි විවාහක තරුණියකි.
මව්බිම