මාර්ග සංඥා ලාම්පු අසළ සිට සිඟමනේ යෙදෙන්නන් සහ ඇතැම් ද්රව්ය අලෙවි කරන්නන්ට මුදල් ලබාදුන් රියදුරන් ඇතුලු පුද්ගලයින් 30 දෙනෙකුට එරෙහිව නීතිමය ක්රියාමාර්ග ගන්නා බව පොලිස් මූලස්ථානය ප්රකාශ කළා.
රියදුරන්ට අමතරව වාහනවල ගමන් ගත් පුද්ගලයින් කිහිපදෙනෙකුද අදාළ පිරිසට අයත්. එමෙන්ම මාර්ග සංඥා ලාම්පු අසළ සිට සිඟමනේ යෙදෙන්නන් සහ ඇතැම් ද්රව්ය අලෙවි කරන්නන්ටද ඉදිරියේදී නීතිමය ක්රියාමාර්ග ගන්නා බවයි පොලිස් මාධ්ය ප්රකාශක නියෝජ්ය පොලිස්පති අජිත් රෝහණ කියා සිටියේ.
පොලිස් බල ප්රදේශ 18 ක් සහ ග්රාමසේවා වසම් 11 ක් තවදුරටත් හුදකලා කර ඇති අතර, ඊයේ රාත්රියේ මහනුවර ග්රාමසේවා වසම් දෙකක් සහ බණ්ඩාරගම ග්රාමසේවා වසම් තුනක්ද හුදකලා කෙරුණා.
මේ අතර අක්කරෙයිපත්තුව ප්රදේශයෙන්ද කොරෝනා වසංගත තත්ත්වයේ යම් ඉහළ යාමක් හේතුවෙන් අක්කරෙයිපත්තුව සෞඛ්ය වෛද්ය නිලධාරී බලප්රදේශයට සංචරණ සීමා පැනවීමට කටයුතු කර තිබෙනවා.
ඒ, අහඹු ලෙස එම ප්රදේශයේ සිදුකළ පී.සී.ආර්. පරීක්ෂණ 20 කින් 10 දෙනෙකුටම වෛරසය ආසාදනය වී ඇති බවට තහවුරු වීම හේතුවෙන්.
එමෙන්ම ගතවූ පැය විසි හතරේ මුව ආවරණ පැළඳ නොසිටි සහ දුරස්ථභාවය තබා නොගත් පුද්ගලයින් 72 ක් අත්අඩංගුවට ගෙන ඇති අතර, මේ වනවිට එලෙස අත්අඩංගුවට ගෙන ඇති සමස්ත පුද්ගලයින් සංඛ්යාව 660 කට ආසන්නයි.
කොරෝනා ව්යාප්තිය පැවතියද බස්නාහිර සහ හුදකලා කර ඇති ප්රදේශ හැර සෙසු ප්රදේශවල පාසල් විවෘත වුවද අද දිනයේ පාසල්වලට සිසුන්ගේ පැමිණීමේ යම් අඩුවක් දක්නට ලැබුණා. ගුරු සංගම් ප්රකාශ කළේ සිසුන්ගේ පැමිණීම බොහෝ ප්රදේශවල ඉතාමත් අවම මට්ටමක පැවති බවයි
මේ අතර මවට සහ පියාට කොරෝනා වෛරසය ආසාදනය වීම හේතුවෙන් පී.සී.ආර්. පරීක්ෂනයට ලක් කළ අම්බලන්ගොඩ ප්රදේශයේ පාසල් දෙකෙහි සිසුන් දෙදෙනාට කොරෝනා වෛසරය ආසාදනය වී නොමැති බවට හඳුනාගෙන තිබෙනවා.
කෙසේ වෙතත් අදාළ පාසල් සිසුන් සහ ඔවුන්ගේ ආශ්රිතයන් තවදුරටත් දින 14 ක් ස්වයං නිරෝධායනයට යොමු කරන බවයි ගාල්ල දිස්ත්රික් ප්රාදේශීය වසංගත රෝග විද්යා ඒකකය සඳහන් කළේ.