දෙවියන්ට යටි හිතින් නිතරම කොදුරමින් තමයි මම උදේ සවස නින්දට ගියේ
කිරි පිටඋගුරේ ගොස් පෙනහැල්ල පිරුණු නිසා දරුවා මැරුණා කියලයි දැනගන්න ලැබුනේ
මෙලොව එලිය දකින මල් කැකුළු අකාලයේ පරව ගිය පුවතක් අපට මැදවච්චිය කනදරාව ගම්මානයෙන් අසන්නට ලැබුණි.
කෙනුජ කල්හාර ප්රේමචන්ද්ර නැමැති මාස 03 ක බිලිඳෙකු තම අවසන් හුස්ම තමා පෝෂණය වන මව්කිරි වලින්ම මරණය කරා ගෙන ගිය එම සෝචනීය සිදු වීම මැදවච්චිය ජනතාව කම්පනයට පත් කරන්නක් වුවාය.
තම මාස 03 ක කිරි කැටියා දෑතට ගෙන හිස හැරුණු අතේ දුවමින් කෙනුජ පුතුගේ පියා දරුවාගේ අවසන් හුස්ම පොද රැක ගැනීමට එදා පටාචාරා මෙන් කනරාව ගම්මානයේ මාර්ගයේ දිව ගියේ විකල් වු සිහියෙන්ය.
කෙනුජ පුතු තම පියාගේ සුරතේ අවසන් හුස්ම හෙලුවේ පියාගේ ඇග සිගිත්තාගේ දකුණු අතින් තද කර ගනිමිනි.
කෙනුජ කල්හාර ප්රේමචන්ද්ර නැමැති මාස 03 ක බිලිදා මෙලොව එලිය දුටුවේ ජයන්ත නැමැති පියාගෙන් සහ ආර්.සුමිත්රා රත්නායක මවගෙන්ය.
කෙනුජ මෙම පුංචි පවුලේ දෙවැනි දරුවාය. පියා සහ මවගේ ශක්තියෙන් ගොඩනැගුණු වරිච්චි බිත්ති සහිත ඉටි රෙදි සෙවිලි කල පුංචි පැල් පතේ ආලෝකය කෙනුජ පුතණුවන් වී තුන් මසක් ගත වන විට ඒ මතකයන් බිත්ති සතරකට සීමා කරමින් සමස්ථ මිනිස් ප්රජාවටම ජීවිතයේ අනියත භාවයේ පාඩම කියා දෙමින් කනදරාව පොදු සුසාන භූමියේදී දහස් සංඛ්යාත ජනයාගේ හිත් සසල කරමින් අවසන් ගමන් ගියේය.
කෙනුජ කල්හාර පුංචි පුතණුවන්ගේ මව හැඩූ කදුලින් තම පුතුගේ අවසන් හෝරාව අපට මෙසේ දිග හැරියේය.
"මගේ පුතා මීට දින 03 කට පෙර සිට විටින් විට අඩන්න ගත්තා. මම හිතුවේ පුතාට අපි භාර හාර වෙලා තියෙන නිසා ඒවා වෙලාවට ඔප්පු කරන්න බැරි වුණ නිසා දරුවා හඬනවා ඇති කියලයි. ඒ වෙලාවේ අතේ මුදල් නොතිබුණු නිසා මුදල් ලැබුණු විගස එම භාර හාර ඔප්පු කරනවා යැයි දෙවියන්ට යටි හිතින් නිතරම කොදුරමින් තමයි මම උදේ සවස නින්දට ගියේ. පුතා අඬද්දි මගේ මහත්තයා පුතාගේ තාත්තා එක වචනයක් කතා කරද්දි දරුවා ඇඩිල්ල නතර කරලා එයත් එක්ක හොදින් හිනා වෙනවා. ඉතින් මම පෙරේදා (01) උදේ 10.00 ට විතර බබාව නාවන්න වතුර බේසමට දාපු වෙලේ ඉදන් දරුවා ඇඩුවා. මහත්තයා එලියේ කෑම කකා හිටියේ. මහත්තයට මම කතා කලා දරුවා අඩන නිසා නලවා ගන්න. එක පාරටම දරුවා වතුරේ බේසමේ සිටියදීම ඇග ගල් ගැහුණා වගේ වුණා. මම හයියෙන් කෑ ගහලා මහත්තයට අඩ ගැහුවා. මහත්තයා දුවලා ඇවිත් දරුවව වඩා ගත්තා. මහත්තයා එතනම ඇද උඩින් දරුවා තියලා දරුවට තට්ටු කරලා නහයට කටින් පිම්බා. නමුත් දරුවාගේ හිටපු විදිය වෙනස් වුණේ නෑ. මහත්තයා එවෙලෙම දරුවා වඩා ගෙන කෑ ගහ ගහ පාරේ දුවගෙන මැදවච්චිය ඉස්පිරිතාලේ වෙත එන්න පිටත් වුණා. මගේ මහත්තයා දරුවව තුරුළු කරන් පාරේ දුවගෙන යද්දි ආපු මෝටර් රථයක් නතර කරලා දරුවයි මහත්තයයි දාගෙන මැදවච්චිය ඉස්පිරිතාලෙට ආවා. එහිදි මුලික ප්රතිකාර කරමින් වෛද්යවරුන් පවසා සිටියේ දරුවා ඒ වෙන කොටත් මිය ගොස් සිටි බවයි. ඉන් අනතුරුව දරුවාව මරණ පරීක්ෂණය සිදු කිරීමට අනුරාධපුර ඉසිපිරිතාලෙට අරන් ගියා. අපට මරණ වාර්තාව අනුව දැන ගන්නට ලැබුණේ කිරි පිටඋගුරේ ගොස් පෙනහැල්ල පිරුණු නිසා දරුවා මැරුණා කියලයි"