අවුරුදු 16ට අඩු බාල වයස්කාර දැරියක වරින් වර අපයෝජනය කළ බවට අනුරාධපුර මහාධිකරණය හමුවේ අධිචෝදනා පහක් ලබා සිටි විත්තිකරුවකු එකී අධිචෝදනා පහටම වරද පිළිගැනීමෙන් පසුව වසර තිහක බරපතළ වැඩ සහිත සිර දඬුවමක් අනුරාධපුර අංක දෙක මහාධිකරණයේ විනිසුරු සහ උතුරු මැද පළාත්බද සිවිල් අභියාචනා මහාධිකරණයේ විනිසුරු ආචාර්ය සුමුදු ප්රේමචන්ද්ර මහතා ඊයේ (2දා) නියම කළේය.
ඊට අමතරව පැමිණිලිකාර දැරියට මුදලින් රුපියල් ලක්ෂයක වන්දියක් ගෙවන ලෙසටද විත්තිකරුට නියෝග කළ මහාධිකරණ විනිසුරුවරයා එම වන්දි මුදල ගෙවීම පැහැර හරින්නේ නම් තවත් වසර දෙකක බරපතළ වැඩ සහිත සිර දඬුවමක්ද නියම කළේය.
ඊටද අමතරව මුදලින් රුපියල් ෙදාළොස් දහස් පන්සියයක දඩ මුදලක් ගෙවන ලෙසටද විත්තිකරුට නියෝග කළ මහාධිකරණ විනිසුරුවරයා එම දඩ මුදල ගෙවීම පැහැර හරින්නේ නම් තවත් වසර දෙකහමාරක සිර දඬුවමකටද යටත් කෙරිණි. නියම කළ තිස් වසරක බරපතළ වැඩ සහිත සිර දඬුවම එකවර ගෙවී යායුතු බවටද නියෝග කෙරිණි.
මෙසේ දඬුවම් නියම වූයේ නොච්චියාගම පහළ වැටියාව ලිපිනයේ එම්. නිහාල් ලක්ෂ්මන් නමැති 48 හැවිරිදි සිවුදරු පියකුටය.
2016 වසරේ ජනවාරි මස 1දා සහ 2016 වසරේ ඔක්තෝබර් මස 6 වැනිදා අතර කාලය තුළ අනුරාධපුර මහාධිකරණ බලප්රදේශයට අයත් නොච්චියාගම අන්දරකැලයදී විත්තිකරු මෙම අපරාධය කර ඇති බවට නීතිපතිවරයා විසින් ඔහුට එරෙහිව ලංකා දණ්ඩ නීති සංග්රහයේ 356 වැනි වගන්තිය ප්රකාරව අධිචෝදනා පහක් යටතේ වෙන් වෙන් වශයෙන් නඩු දෙකක් අනුරාධපුර අංක දෙක මහාධිකරණය හමුවේ පවරා තිබිණි.
මෙම නඩුවේ ලඝු නොවන මූලික විභාගය තඹුත්තේගම සංචාරක මහෙස්ත්රාත් අධිකරණය හමුවේ පැවැති අතර විත්තිකරුට අධිචෝදනා භාර දීමෙන් පසුව වැඩිදුර විභාගය සඳහා අනුරාධපුර අංක දෙක මහාධිකරණයට යොමු කර තිබිණි.
පැමිණිලි පාර්ශ්වය වෙනුවෙන් රජයේ අධිනීතිඥ ක්රිෂාන්ද අල්විස් ගුණතිලක මහතා පෙනී සිටි අතර විත්තිකරු වෙනුවෙන් නීතිඥ සුරංග මොහොට්ටි සහ ගයාන් සිරිවර්ධන යන මහත්වරු පෙනී සිටියහ.
අනුරාධපුර - ආනන්ද කරුණාදාස
උපුටා ගැනුම - මව්බිම පුවත්පත