වයස අවුරුදු 34ක් වන ඇයට දරුවන් තිදෙනෙකි. වයස අවුරුදු 16 සහ 11 වැනි වියේ දියණියන් දෙදෙනකු සහ අවුරුදු 08ක පිරිමි දරුවකුද ඒ අතර වේ. ඇයගේ සැමියා ඔවුන් හැර ගොස් ඇත. සැමියා විසින් නඩත්තු ගෙවීමත්, මාසයකට වතාවක් දරුවන් දැක ගැනීමට පැමිණ ඇති බව පොලිස් පරීක්ෂණවලදී අනාවරණය වී ඇත. ඊට අමතරව සැකකාර කාන්තාවගේ සහෝදරියන්ද දරුවන් පෝෂණය කිරීම සඳහා අවශ්ය සහාය ලබා දී ඇති බව විමර්ශනවලදී හෙළිවී ඇත.
මේ අතර සැකකාර කාන්තාව වෙනත් පුද්ගලයකු සමඟ අනියම් ඇසුරක් පවත්වා ඇත. එම පුද්ගලයා මෙම කාන්තාවගේ නිවෙසට රාත්රි කාලයේ පැමිණීම නිසා වැඩිමහල් දියණිය සහ සැකකාර කාන්තාව අතර මත ගැටුම්ද තිබී ඇති බව පොලිසිය අනාවරණය කරගෙන ඇත.
මේ අතර පසුගිය දිනක රාත්රි කාලයේ එක් වරම පැමිණ ඇති ත්රිරෝද රථයක නැඟී ඇය නිවෙසින් පිටත්ව යෑමට උත්සාහ කර ඇත.
එහිදී වැඩිමහල් දියණිය ඊට විරෝධය පළ කර ඇත. තමන් අසනීප තත්ත්වයෙන් පෙළෙන බවත්, ප්රතිකාර ලබා කඩිනමින් නිවෙසට පැමිණෙන බවත් පවසා ඇති කාන්තාව පිටත්ව ගොස් ඇත.
නමුත් මව ආපසු නිවෙසට නොපැමිණීම නිසා වැඩිමහල් දියණිය මේ බව මාදම්පේ පොලිසියට පැමිණිලි කර ඇත. ඒ අනුව කරන ලද විමර්ශනවලදී සියලු තොරතුරු අනාවරණය වී ඇත.
වයස අවුරුදු 18ට අඩු දරුවන්ට මානසික සහ කායික පීඩා ඇති වන ආකාරයට කටයුතු කිරීම නිසා සැකකාර කාන්තාවට එරෙහිව කෲරත්වය හමුවේ නඩු පවරන බව පැමිණිල්ල ඉදිරිපත් කළ මාදම්පේ පොලිසියේ ළමා හා කාන්තා කාර්යාංශයේ ස්ථානාධිපතිනි පොලිස් පරීක්ෂිකා ගයනි සඳමාලි රුද්රිගු මහත්මිය අධිකරණය හමුවේ කියා සිටියාය. එමෙන්ම සැකකාර කාන්තාව විදෙස් ගත වීමට ඉඩ ඇති බැවින් ඒ සම්බන්ධයෙන්ද සුදුසු ක්රියාමාර්ගයක් ගන්නා ලෙස පොලිස් පරීක්ෂකවරිය අධිකරණයෙන් ඉල්ලා සිටියාය.
සැකකාර කාන්තාවගේ විදෙස් ගමන් තහනම් කළ දිසා විනිසුරුවරයා ඒ බව ආගමන විගමන පාලකවරයා වෙත දන්වා යැවීමටද නියෝග කළේය.
අගතියට පත්ව ඇති දරුවන් තිදෙනා සැකකාර කාන්තාවගේ සහෝදරියන් භාරයට පත් කිරීමටද දිසා විනිසුරුවරයා නියෝග කළේය.
නාත්තන්ඩිය - සමන්ප්රිය ජයශාන්ත
(උපුටා ගැනීම - මව්බිම පුවත්පත)