එයට හේතුව ඇය සුප්රකට සිනමාකරු මනි රත්නම්ගේ අලුත්ම චිත්රපටයේ රඟපෑමට සූදානම් වීමයි. මෙම සිනමාපටයේ අයිශ්වර්යා ද්විත්ව චරිතයක් රඟපෑමත් විශේෂත්වයක්. මෙයින් ඇය නැවතත් නිළියක ලෙස ලොකු කීර්තියක් දිනාගනු ඇතැයි බොහෝ දුරට බලාපොරොත්තු විය හැකියි.
මනි රත්නම්ගේ මෙම සිනමාපටය 'පොනියින් සෙල්වන්' නමැති ඉතා ජනප්රිය ඓතිහාසික නවකතාවක් ඇසුරෙන් නිපදවෙන්නක් බවයි වාර්තා වන්නේ.
මෙම නවකතාව කාණ්ඩ 5කින් යුතු පිටු 2,400ක පමණ ඉතා දිග නවකතාවක්. මෙයින් කියැවෙන්නේ රාජ රාජ චෝලන් නමැති ඉතා ප්රසිද්ධ දකුණු ඉන්දියානු අධිරාජයාගේ කතාවයි.
ඔහු කලක් ලංකාවේ ඇතැම් ප්රදේශ ද පාලනය කළ බව ඉතිහාසයේ සඳහන් වෙනවා. මෙම නවකතාවේ කතුවරයා වන කල්කි ක්රිෂ්ණමූර්ති මෙම පොත ලිවීම සඳහා තොරතුරු රැස් කරමින් සිටි කාලයේ කිහිප වරක් ලංකාවට ද පැමිණ ඇති බව සඳහන්.
මනි රත්නම් යනු ඉන්දියාවේ විශාල ගෞරවයක් දිනාගත් අධ්යක්ෂවරයෙක්. ඔහුගේ චිත්රපටයක රඟපාන්නට ලැබීම බොහෝ නළු නිළියන් සලකන්නේ තමුන්ට ලැබෙන සුවිශේෂී අවස්ථාවක් හැටියටයි. අයිශ්වර්යා ද මේ සම්බන්ධයෙන් බෙහෙවින් සතුටටත්, නොඉවසිල්ලටත් පත්ව සිටින බව පෙනෙනවා.
ඇය පළමු වරට සිනමාවට පිවිසුණේ ද මනි රත්නම්ගේම චිත්රපටයකින්. ඒ 1997 වසරේ තිරගත වුණු 'ඉරුවර්' නමැති චිත්රපටයෙනුයි. එයින් පසු ඔහුගේ 'ගුරු' (2007) සහ 'රාවන්' (2010) යන චිත්රපටවලත් ඇය රඟපෑවා.
මනි රත්නම් යනු සිනමාවේ තමාගේ ගුරුවරයා හැටියටයි අයිශ්වර්යා සලකන්නේ. අයිශ්වර්යාට අමතරව අමිතාබ් බච්චන්, කීර්ති සුරේෂ්, කාර්ති වැනි තවත් සුප්රකට නළු නිළියන් රැසක් මනි රත්නම්ගේ අලුත් චිත්රපටයේ රඟපානු ඇති බවට ආරංචි පළවෙමින් තිබෙනවා. ඉදිරි දිනවල මෙහි රූපගත කිරීම් ආරම්භ කිරීමට නියමිත අතර එය විශාල වියදමක් දරා නිපදවන දැවැන්ත සිනමාපටයක් වනු ඇති. ලබන වසරේ මෙය ප්රේක්ෂකයන් හමුවට පැමිණීමට නියමිතයි.
අයිශ්වර්යා අවසන් වරට රඟපෑ සිනමාපටය වූයේ 'ෆැනී ඛාන්' නමැති චිත්රපටයයි. 2018 වසරේ තිරගත කෙරුණු එහි අනිල් කපූර් සහ රාජ්කුමාර් රාඕ වැනි ජනප්රිය ශිල්පීන් ද රඟපෑවත් එය ආදායම් වාර්තා අතින් එතරම් සාර්ථක වුණේ නැහැ.
මේ වනවිට 45 වැනි වියෙහි පසුවන අයිශ්වරයා පළමු වරට ලෝක අවධානයට පාත්ර වූයේ 1994 වසරේ ලෝක රූ රැජින කිරුළ හිමි කරගැනීමත් සමඟයි. 1997 වසරේ ඇය සිනමාවට පිවිසුණේ ඉන් අනතුරුවයි. කලින් සඳහන් කළ 'ඉරුවර්', 'ගුරු', 'රාවන්' චිත්රපටවලට අමතරව 'රේන්කෝට්', 'මොහොබතීන්', 'දේව්දාස්', 'ජෝදා අක්බර්' වැනි චිත්රපටවල ඇයගේ රඟපෑම් විශාල වශයෙන් කතාබහට ලක් වුණා.