මව්වරුන් 4,000 ක් වඳ භාවයට පත් කළා යැයි චෝදනා එල්ල වූ කුරුණෑගල වෛද්‍යවරයාට එරෙහිව තවත් පැමිණිලි 03 ක් - Kurunagala VOG - Hiru Gossip, Lanka Gossip | Hirugossip | Hiru Gossip | Hiru Fm Gossip | Hiru Gossip Official Web Site |Lanka Gossip

May

මව්වරුන් 4,000 ක් වඳ භාවයට පත් කළා යැයි චෝදනා එල්ල වූ කුරුණෑගල වෛද්‍යවරයාට එරෙහිව තවත් පැමිණිලි 03 ක්

5 Views

චෝදනා කිහිපයක් සම්බන්ධයෙන් අත්අඩංගුවට ගෙන සිටින කුරුණෑගල ශික්ෂණ රෝහලේ සේවය කරන ප්‍රසව හා නාරිවේද වෛද්‍යවරයාට එරෙහිව තවත් කාන්තාවන් තුන් දෙනෙකු රෝහලේ පාලන අධිකාරිය වෙත පැමිණිලි කර තිබෙනවා.

මීට පෙර කාන්තාවන් දෙදෙනෙකු මෙම වෛද්‍යවරයාට එරෙහිව පැමිණිලි කර තිබූ අතර, ඒ අනුව මොවුන් පස්දෙනාගෙන්ම ප්‍රකාශ ලබාගෙන ඇති බවයි කුරුණෑගල ශික්ෂණ රෝහලේ අධ්‍යක්‍ෂ වෛද්‍ය සරත් වීරබණ්ඩාර හිරු ප්‍රවෘත්ති අංශය කළ විමසීමකදී සඳහන් කළේ.

සැකසහිත ආකාරයට වත්කම් ඉපයීම සම්බන්ධයෙන් කුරුණෑගල මහරෝහලේ වෛද්‍ය සෙයිගු සියාබ්දීන් මොහොමඞ් සාෆි අත්අඩංගුවට ගනු ලැබුවේ පසුගිය 24 වනදා රාත්‍රියේයි.

ඒ, ඔහුගේ කුරුණෑගල නුවර පාරේ පිහිටි නිවසේදියි. පසුව මොහු වැඩිදුර විමර්ශන සඳහා අපරාධ පරීක්ෂණ දෙපාර්තමේන්තුව වෙත භාරදෙනු ලැබුවා.

42 හැවිරිදි මොහු වසර 13 කට අධික කාලයක් රෝහල් තුනක ප්‍රසව සහ නාරි වෛද්‍ය ඒකකයට අනුයුක්තව සේවය කර තිබෙනවා.

සිසේරියන් සැත්කම් අතරතුර මව්වරුන් 4,000 ක් වඳ භාවයට පත් කළ වෛද්‍යවරයෙකු පිළිබඳව ජාතික පුවත්පතක් පසුගිය බ්‍රහස්පතින්දා වාර්තා කර තිබූ අතර, එම වාර්තාවලින් පසුවයි මොහු සම්බන්ධයෙන් කරුණු අනාවරණ වුණේ.

පොලිස් මාධ්‍ය ප්‍රකාශක, පොලිස් අධිකාරී රුවන් ගුණසේකර කොළඹ ඊයේ පැවැති මාධ්‍ය හමුවකට එක්වෙමින් සඳහන් කළේ අදාළ වෛද්‍යවරයා සම්බන්ධයෙන් පැමිණිලි ඇත්නම් අපරාධ පරීක්ෂණ දෙපාර්තමේන්තුව වෙත ඉදිරිපත් කරන ලෙසටයි.

මේ අතර, චෝදනා එල්ල වී ඇති වෛද්‍යවරයා සම්බන්ධයෙන් රෝහල් පරිපාලන අධිකාරියෙන් ද පරීක්ෂණයක් ආරම්භ කර තිබෙනවා.