හීන දිනවන්න කොරියාවට යන්න, සිහින දකින ඔයාටයි මේ දැනුම්දීම... - Social Story - Hiru Gossip, Lanka Gossip News | Hirugossip | Hiru Gossip | Hiru Fm Gossip | Hiru Gossip Official Web Site | Lanka Gossip

Oct

හීන දිනවන්න කොරියාවට යන්න, සිහින දකින ඔයාටයි මේ දැනුම්දීම...

6,164 Views

E-8 යන වීසා ගිවිසුම හිටපු අමාත්‍යවරයා නීත්‍යානුකූල නොවන ලෙස අත්සන් කළ ගිවිසුමක් බව ශ්‍රී ලංකා විදේශ සේවා නියුක්ති කාර්යාංශයේ සභාපති කෝශල වික්‍රමසිංහ පවසනවා.

සභාපතිවරයා ඊයේ (28) මාධ්‍ය වෙත කියා සිටියේ ලංකාවේ කිසිඳු පෞද්ගලික ඒජන්සි ආයතනයකට ශ්‍රමිකයින් මේ වීසා ක්‍රමය යටතේ කොරියාවට යවන්න හෝ මුදල් එකතු කරන්න අවසර දී නොමැති බවයි.

'දකුණු කොරියානු රජය හා ශ්‍රි ලංකා රජය එක්වෙලා දහස් ගණනක ශ්‍රි ලාංකික තරුණ පිරිසකට රැකියා අවස්ථා ලබාදීලා තිබෙන අතර එම රැකියා වලට අමතරව E-8 යන වීසා ක්‍රමවේදය පිළිබඳව මේ වන විට සමාජයේ කතිකාවතක් ඇතිවෙලා තිබෙනවා.

2019 වසරේ ඉඳන් මෙම රැකියා ලාංකිකයින්ට ලබාගැනීමට සාකච්ඡා කර තිබු නමුත් යම් යම් කරුණු හේතුවෙන් එම සාකච්ඡා නතර වෙලා තිබෙන බව සභාපතිවරයා කියා සිටියා.

ශ්‍රී ලංකා විදේශ සේවා නියුක්ති කාර්යාංශයේ සභාපති කෝශල වික්‍රමසිංහ මෙසේ අදහස් පල කර සිටියා “ 2024 අප්‍රේල් 06 දින මෙරට හිටපු අමාත්‍යවරයෙක් තම පුද්ගලික අභිමාතාර්ථ අනුව ඒ රටට ගිහින් වන්දෝ (Wando) කියන පලාතේ ආණ්ඩුකාරවරයාත් සමග ගිවිසුමක් ගහනවා. මේකට එවකට කැබිනට් අනුමැතිය හෝ වෙනත් කිසිඳු අනුමැතියක් අරන් නෑ. අනුමැතියක් නොමැතිව මේ වගේ පුද්ගලික මැදිහත්වීමක් කළාට පස්සේ විදේශ සේවා නියුක්ති කාර්යාංශයට කිසිඳු වගකීමක් ගන්න බෑ. මේක සමාජ ගතවෙන්නේ ඇමතිවරයා ගිහින් රැකියා අරන් ආවා. ඒක මේ රජයෙන් නතර කරන්න හදනවා කියලා. ඇත්තටම වෙලා තියෙන්නේ නීත්‍යානුකූල නොවන ගිවිසුමකට එළඹිලා වන්දෝ (Wando) පළාතේ ආණ්ඩුකාරවරයා රවටලා නොමග යැව්වට දකුණු කොරියානු රජයට මේ ගැන ආරංචිවෙලා අපි සමග සාකච්ඡා කළා මේ ක්‍රමයට ශ්‍රමිකයින් ගෙන්න ගන්න එපා.

ඒ අය විසා නොමැතිව රැඳි ඉන්න හදනවා කියලා. කොරියානු රජයේ යම් ප්‍රමිතියක් තියෙනවා E-9 වීසා යටතේ පසුගිය වසරේ දකුණු කොරියාවට 7500ක් පමණ ගියා, මේ වසරේ මේ වෙනකොට 4000ට අධික ප්‍රමාණයක් ගිහින් ඉන්නවා. මේ වසර අවසාන වෙනකොට 7000ට අධික ප්‍රමාණයක යවන්න පුළුවන් කියලා හිතෙනවා. ඒ කණ්ඩායම යන්නේ වසර 4යි මාස 10ක කාලයකට. කෙටි කාලීන විසා ක්‍රමවේදය යටතේ ගිහින් ලංකාවේ අය නීතිවිරෝධිව රැඳි සිටියොත් මේ පිරිසටත් රැකියා අහිමිවීමේ අවධානමක් තියෙනවා කියලා දකුණු කොරියානු රජයෙන් දැනුම්දීමක් කරලා තිබෙනවා. ඒක නිසා නීත්‍යානුකූල ක්‍රමවේදයට ලැබුණු රැකියා, විශාල ආදායමක් ලබාගත හැකි රැකියා නැති කරගන්න අපි කිසිසේත්ම සූදානම් නෑ. අපි මේක නැවත සමාලෝචනය කළ යුතුයි කියන තීරණයේ ඉන්නවා. ඊට තව සුළු කාලයක් යයි. කොරියානු රජය තරහ කරගන්නේ නැතිව අපි මේ ක්‍රමවේදය ක්‍රියාත්මක කරනවා. අපි රැකියා ලාභීන්ගෙන් ඉල්ලා සිටින්නේ E-8 යන වීසා ක්‍රමවේදය යටතේ දකුණු කොරියාවට යන්න මුදල් දෙන්න එපා. කිසිම දිරිමත් කිරීමක් කරන්න එපා. කවුරුන් හෝ මේ රැකියා සඳහා මුදල් අය කරන්නේ නම් කරුණාකර අපිව දැනුවත් කරන්න කියලා අපි මහජනතාවගෙන් ඉල්ලා සිටිනවා. ඒ වගේම මේ වීසා ක්‍රමවේදය නිත්‍යානුකූල ක්‍රමවේදයක් නොවෙයි කියලා සමාජයත් දැනුවත් කරන මෙන ඉල්ලා සිටිනවා යැයි ශ්‍රී ලංකා විදේශ සේවා නියුක්ති කාර්යාංශයේ සභාපති කෝශල වික්‍රමසිංහ වැඩිදුරටත් කියා සිටියා.