ආන්දෝලනාත්මක මිග් යානා ගනුදෙනුව සම්බන්ධයෙන් චෝදනා එල්ලව සිටි රුසියාවේ හිටපු ශ්‍රී ලංකා තානාපති උදයංග වීරතුංග කටුනායක ගුවන්තොටුපළේදී අපරාධ පරීක්ෂණ දෙපාර්තමේන්තුව මගින් අද අලුයම අත්අඩංගුවට ගත්තා.

පැය 10 කට අධික කාලයක් ප්‍රශ්න කිරීමෙන් අනතුරුව උදයංග වීරතුංගව අද පස්වරු 6.30 ට පමණ කොළඹ - කොටුව මහේස්ත්‍රාත් අධිකරණය වෙත ඉදිරිපත් කළා.

මිග් යානා ගනුදෙනුව සම්බන්ධයෙන් චෝදනා එල්ල වී වරෙන්තු මත ඕමානයේ රැඳී සිටි රුසියාවේ හිටපු තානාපති උදයංග වීරතුංග අත්අඩංගුවට ගැනීම සඳහා අපරාධ පරික්ෂණ දෙපාර්තමේන්තුවේ නිලධාරීන් කණ්ඩායමක් දින කිහිපයකට පෙර ඕමානය බලා පිටත්ව ගොස් තිබුණා.

එහිදී අපරාධ පරීක්ෂණ දෙපාර්තමේන්තුව භාරයට ගෙන ඇති හිටපු තානාපතිවරයා අද අලුයම 4.30 පමණ මෙරටට රැගෙන ආවා.

ඕමානයේ මස්කට් නුවර සිට ඔහුව මෙරටට රැගෙන ආවේ ශ්‍රී ලංකන් ගුවන් සේවයට අයත් යු.එල්. 208 දරණ යානයෙන්.

පසුව ඔහු අපරාධ පරික්ෂණ දෙපාර්තමේන්තු මුලස්ථානයට රැගෙනවිත් මිග් යානා ගනුදෙනුව අදාළව ප්‍රකාශයක් ලබා ගෙන තිබෙනවා.

පැය 10කට අධික කාලයක් ප්‍රකාශ සටහන් කර ගැනීමෙන් අනතුරුව උදයංග වීරතුංගව පස්වරු 6.30 ට පමණ කොළඹ - කොටුව මහේස්ත්‍රාත් රංග දිසානායක මහතා හමුවට ඉදිරිපත් කිරීම සඳහැ රැගෙන ආවා.

මහේස්ත්‍රාත් නිල මැදිරියේදී උදයංග වීරතුංගව මහේස්ත්‍රාත් හමුවට ඉදිරිපත් කළා.

මිග් යානා ගනුදෙනුව සම්බන්ධයෙන් පොලිස් මුල්‍ය අපරාධ විමර්ශන කෝට්ඨාසය සිදුකළ විමර්ශනවලදී චෝදනා එල්ල වු රුසියාවේ හිටපු ශ්‍රී ලංකා තානාපති උදයංග වීරතුංග ජාත්‍යන්තර පොලීසිය හරහා අත්අඩංගුවට ගැනීමට කොටුව මහේස්ත්‍රාත් අධිකරණය පළමුව වරෙන්තු නිකුත් කළේ 2016 වසරේ ඔක්තෝම්බර් 20 වනදායි.

මුදල් විශූද්ධිකරණ පනත යටතේ අක්‍රමිකතාවක් සිදුකර ඇති බවට ඔහුට චෝදනා එල්ල වී තිබුණා.

2017 වසරේ ජනවාරි 4 වනදා ඔහුට අයත් බැංකු ගිණුම් 16ක ගනුදෙනු අත්හිටුවීමට ද අධිකරණය නියෝග කළ අතර අනතුරුව රාජ්‍ය තාන්ත්‍රික විදේශ ගමන් බලපත්‍රය ඇතුළු ගමන් බලපත්‍ර ද තහනම් කළා.

උදයංග වීරතුංගව අත්අඩංගුවට ගැනීම සඳහා ජාත්‍යන්තර පොලීසිය ඔහුට එරෙහිව රතු නිවේදනයක් ද නිකුත් කර තිබීම විශේෂත්වයක්.

තමන් අත්අඩංගුවට ගැනීමේ වරෙන්තුව අවලංගු කරන ලෙස ඉල්ලා උදයන්ග වීරතුංග ශ්‍රේෂ්ඨාධිකරණය හමුවේ පෙත්සමක් ද ගොනු කර තිබූ අතර ශේෂ්ඨාධිකරණය එය ප්‍රතික්ෂේප කර තිබුණා.

update : Friday, 14 February 2019 - 19.04
--------------------------------------------

රුසියාවේ හිටපු ශ්‍රී ලංකා තානාපති උදයංග වීරතුංග කොටුව මහේස්ත්‍රාත් අධිකරණයට

අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් රුසියාවේ හිටපු ශ්‍රී ලංකා තානාපති උදයංග වීරතුංග කොටුව මහේස්ත්‍රාත් අධිකරණයට ඉදිරිපත් කර තිබෙනවා.