අංගොඩ ලොක්කා ලඩියා කල්ලි සාමාජිකයින් රැසක් සමයං කල්ලිය විසින් ඝාතනය කරන විට සමයං හා ඔහුගේ ළඟම ගෝලයින් හතර දෙනා සිටියේ රක්ෂිත බන්ධනාගාර ගතවය. මාකඳුරේ මධූෂ් සිය එක් කල්ලියක් වන අංගොඩ ලොක්කා සහ ලඩියා ප්රමුඛ කල්ලිය මෙහෙයවා සමයං ඇතුළු ගෝල බාලයින් මරා දමන්නේ පසුගිය වසරේ පෙබරවාරි මස 8 වැනිදා උදෑසන කළුතරදී ඔවුන් කඩුවෙල අධිකරණය වෙත රැගෙන එමින් සිටියදීය. සමයං ඇතුළු පස් දෙනෙකු එම ප්රහාරයෙන් මරණයට පත්විය.
සමයංගේ මරණයෙන් පසු ඌරු ජුවා, ආමි අසංක ඇතුළු පුද්ගලයින් කිහිපදෙනෙක් එම කල්ලියේ නායකත්වය ගැනීමට කටයුතු කරමින් සිටියහ. ඒ අනුව සමයංට කප්පම් ගෙවූ පුද්ගලයින්ට තර්ජනය කරමින් කප්පම් මුදල් ඒ ආකාරයෙන්ම දෙන ලෙසට තර්ජනය කර තිබුණි. ඩී. මංජු නම් පාතාල ප්රබලයා මීට දෙවසරකට පෙර සිර ගත වන්නේ පාතාල නායක මධූෂ්ගේ කුඩු ජාවාරමේ ප්රබලයා වන හර්ෂ යසස් නැමති පුද්ගලයා වෙඩි තබා ඝාතනය කිරීමට අනුබල දීමේ චෝදනාව යටතේය.
කලක් බන්ධනාගාර ගතව සිට පසුව නිදහස් වී පැමිණි ඔහු බස්නාහිර උතුර පොලිස් බල ප්රදේශයේ වාසය කළේය. උප නගරාධිපතිවරයෙකු වන ශ්යාමිල් සඳරුවන් වෙඩි තබා ඝාතනය කිරීමේ චෝදනාවටද ඩී.මංජු සැකපිට අත්අඩංගුවට පත්විය. දිලීප් රෝහණ නැමැත්තාද එම ඝාතනයට සැකපිට පොලිස් අත්අඩංගුවට පත්වී සිටියේය.
පසුව ඔවුන් දෙදෙනාම ඇප මත නිදහස්වන අතර ඔවුන් දෙදෙනා එක්ව හොර රහසේ සමයංගේ කුඩු ජාවාරම කරගෙන ගොස් තිබුණි. ඉකුත් පෙබරවාරි මස 23 වන දා ඩී.මංජු එස්.ටී.එෆ්. සමඟ ඇතිවූ වෙඩි හුවමාරුවකදී මරණයට පත්විය.
ඔහුගේ මරණයෙන් අනතුරුව දිලීප් රෝහණ රහසිගතව කුඩු ජාවාරමේ නිරත වන බවට එස්.ටී.එෆ්. බලකායට තොරතුරක් ලැබී තිබුණි. ඒ අයිස් හා හෙරොයින් නම් මත්ද්රව්ය දෙවර්ගයම ජාවාරමේ නිරත වෙමින් ඔහු තලාතුඔය ප්රදේශයේ රැඳී සිටින බවටයි තොරතුරු ලැබී තිබුණේ. එහිදී තොරතුරු ලැබී තිබුණේ ඇත්තේ 26 හැවිරිදි විවාහකයෙකු වන ඔහු 36 හැවිරිදි කාන්තාවක් සමග අනියම් සබඳතාවක් පවත්වමින් ඇය සමඟ තලාතුඔය ප්රදේශයේ නිවසක ඉන්නා බවයි.
එම තොරතුරු නිවැරදි බව සනාථ කරගත් එස්.ටී.එෆ්. බලකාය දිලීප් රෝහණ අත්අඩංගුවට ගැනීමට ඒකාබද්ධ මෙහෙයුමක් ක්රියාත්මක කළහ. ඔවුන් ඉකුත් 5 වැනිදා අදාළ නිවස වැටලීමට කටයුතු කළ අතර දිලීප් රෝහණ තමා අතවූ පිස්තෝලයෙන් එක් එස්.ටී.එෆ්. නිලධාරියෙකුට වෙඩි තබන්නට වූ අතර එම නිලධාරියා ආරක්ෂිතව ඔහු සිටි ස්ථානයෙන් ඉවත් වනවාත් සමඟ වෙනත් නිලධාරියෙකු වෙත සැකකරුගේ පිස්තෝලය එල්ල වත්ම එම නිලධාරියා ක්රියාත්මක වී සැකකරුට වෙඩි පහරක් එල්ල කළේය.
ඉන්පසු සැකකරු මහනුවර රෝහල වෙත රැගෙන යන්නට කටයුතු කළ ද පැය භාගයක් ඇතුළත ඔහු ජීවිතක්ෂයට පත්විය. දිලීප් රෝහණගේ මරණයත් සමඟ සමයං කල්ලියේ මත්ද්රව්ය ජාවාරම අවසන් වනු ඇති බව පැවසේ.