මුන්දලම බත්තුළුඔය 61 හංදිය ප්රදේශයේදී ගිලන් රථයක් හා ලොරි රථයක් ගැටී සිදු වූ රිය අනතුරින් වෛද්යවරියක හා ගිලන්රථ සහයකවරයකු මිය යාමේ සිද්ධියට අදාල ලිපි ලේඛන නිසි ආකාරයෙන් සකස් නොකර සිද්ධිය වසන් කිරීමේ පරිපාලන වරද සම්බන්ධයෙන් මුන්දලම පොලිස් ස්ථානයේ රථ වාහන ස්ථානාධිපතිවරයා ඇතුළුව තිදෙනකුගේ සේවය වහාම ක්රියාත්මක වන පරිදි අත්හිටුවීමට පුත්තලම කොට්ඨාශ භාර ජ්යෙෂ්ඨ පොලිස් අධිකාරි සඳුන් ගහවත්ත මහතා කටයුතු කර තිබේ.
පසුගිය 18වැනිදා අලුයම මුන්දලම පොලිස් වසමට අයත් ආනවිලුන්දාව,රම්සා අභය භූමිය ආසන්නයේ 61 හංදියට නුදුරින් ගිලන් රියක් හා ලොරියක් ගැටීමෙන් මෙම අනතුර සිදු වී තිබුණි. අදාල ගිලන් රිය කොත්තන්තිව් ග්රාමිය රෝහලට අයත් එකක් වූ අතර, එම ගිලන් රිය සමග එහි රියදුරු හා සහයකයා 17වැනිදා රාත්රියේ පුත්තලම මූලික රෝහලට කැඳවා තිබුණේ අසාධ්ය තත්ත්වයේ සිටී කුඩා දරුවකු කොළඹ රිඡ්වේ ආර්යා ළමා රෝහලට රැගෙන යාමටය.
එම ගිලන්රිය සමග පුත්තලම මූලික රෝහලේ ළමා රෝගී ඒකකයේ සේවය කළ සීමාවාසික වෛද්යවරියක වූ ඉෂාණි එරංගා ජයවර්ධන (26) මෙනවිය සමග පුත්තලම රෝහලේ හෙදියක් සාත්තු සේවිකාවක් අදාල රාජකාරි සදහා යොදවා තිබුණි.
බරපතල තත්ත්වයේ සිටි කුඩා දරුවා ළමා රෝහලට ඇතුළත් කර ආපසු පුත්තලම මූලික රෝහල කරා එමින් සිටියදී කිලිනොච්චිය සිට කොළඹ බලා ගමන් කරමින් තිබූ වේදිකා සැරසිලි උපකරණ ප්රවාහනය කරමින් තිබූ ලොරි රථයක් එකවරම ගිලන් රිය ගමන්ගත් ප්රතිවිරුද්ධ දිශාව වෙත මාර්ගය හරස්වන ආකාරයෙන් එකවරම නැවතී ඇති බව කියයි.
මෙහිදී ගිලන් රථ රියදුරාට ගිලන් රිය පාලනය කර ගැනීමට නොහැකි වීමෙන් අදාල ලොරි රථයේ ගැටී ඇති බව කියවේ. එහිදී අදාල ගිලන් රියේ ගමන්ගත් වෛද්යවරිය ඇතුළු රෝහල් කාර්ය මණ්ඩලයේ පස්දෙනකු බරපතල තුවාල ලබා හලාවත මූලික රෝහලට ඇතුළත් කර තිබූ අතර රෝහලට ඇතුළත් කර තිබූ වෛද්යවරිය හා ගිලන් රථ සහයක වන ඒ.එම්.එම්.ඉර්ෂාඩ් මහතා මරණයට පත්ව තිබුණි.
අදාල රිය අනතුර සම්බන්ධව ලොරි රථයේ රියදුරා වන යූ.එම්.සුජිත් ජීවා මුන්දලම පොලිසිය මගින් අත්අඩංගුවට ගෙන ඇත්තේ සිද්ධිය සිදු වී පැය 08ට ආසන්න කාලයක් තුළදී බව කියයි. අදාල සැකකාර රියදුරා හලාවත වැඩ බලන මහේස්ත්රාත් නිශ්ශංක රූපසිංහ මහතා වෙත මුන්දලම පොලිස් ස්ථානයේ රථ වාහන අංශය මගින් ඉදිරිපත් කර තිබූ අතර අදාල සැකකාර රියදුරාට ලක්ෂ දෙක බැගින් වූ පුද්ගලික ඇප දෙකක් නියම කරමින් ඇප මත මුදා හැරීමට වැඩ බලන මහේස්ත්රාත්වරයා නියෝග කර තිබුණි.
එම සිද්ධිය සම්බන්ධව මුන්දලම පොලීසිය සිදු කළ පරීක්ෂණ කිසිදු ආකාරයෙන් සාධාරණ නැති බවත් පොලිසිය පක්ෂග්රාහී වෙමින් මෙම සිද්ධියේදී කටයුතු කර ගිලන් රථ රියදුරාට වරද පටවා ලොරි රථ රියදුරාව බේරා ගැනීමේ ක්රියාවලියක් සිදුකර ඇති බවත් පවසමින් පුත්තලම මූලික රෝහලේ සියලුම වෛද්ය කාර්ය මණ්ඩල (20)වැනිදා උදේ 8.00සිට (21) වන දින උදේ 8.00 දක්වා හදිසි ප්රතිකාර හැර අනෙකුත් සියලුම රෝහල් කටයුතුවලින් ඉවත් වී මෙම සිද්ධිය සම්බන්ධව අපක්ෂපාති පරික්ෂණයක් පවත්වන ලෙස ඉල්ලමින් දැවැන්ත විරෝධතාවයක් පවත්වා තිබුණි.
ඒ සම්බන්ධව පොලීසිය නිසි ආකාරයෙන් කටයුතු නොකළහොත් රට පුරා සියලුම රෝහල් කටයුතුවලින් ඉවත්වීමට කටයතු කරන බව රජයේ වෛද්ය නිලධාරි සංගමය අනතුරු අඟවා තිබුණි. එයට පෙර පුත්තලම කොට්ඨාස භාර ජ්යෙෂ්ඨ පොලිස් අධිකාරිවරයා අදාල අනතුර සම්බන්ධව මූලික පරික්ෂණයක් 20වැනිදා ආරම්භ කර තිබූ අතර එම පරික්ෂණය අනුව මුන්දලම පොලිසියේ රථ වාහන අංශ ස්ථානාධිපතිවරයා ඇතුළු තවත් නිලධාරීන් දෙදෙනකු අදාල අනතුර සම්බන්ධව අදාල ලිපි ලේඛන නිසියාකාරයෙන් සකස් නොකිරීමේ චෝදනා මත මෙය පරිපාලන වරදක් බව අනාවරණය කර ගැනීමෙන් පසු ඉහත පොලිස් නිලධාරින් තිදෙනාගේ සේවය අත්හිටුවීමට නියෝග ලබා දී තිබුණි.