ඩෙංගු රෝගය විශාල වශයෙන් පැතිර යාම හේතුවෙන් කුරුණෑගල ශ්රීමත් ජෝන් කොතලාවල විද්යාලයේ දරුවන් 3000කට ආසන්න පිරිසක් හා ගුරුවරුන් 60 දෙනෙකු පමණ ද ඊයේ (30) පාසල් පැමිණ නොමැති බව වාර්තා වනවා.
මෙහි සිසුන් 50ක් පමණ හා ගුරුවරුන් 15 දෙනෙකු පමණ ඩෙංගු වැළඳී රෝහල්ගත කර ඇතැයි සඳහන්.
6 වන ශ්රේණියේ දරුවකු ඩෙංගු රෝගය නිසා පසුගිය සතියේදී මියගොස් ඇති අතර රෝහලේනේවාසිකව ප්රතිකාර ලබන රෝගීන් අතර නියෝජ්ය විදුහල්පතිවරයා සහ ඔහුගේ දියණිය ද ප්රාථමික අංශයේ නියෝජ්ය විදුහල්පතිවරයා ද වනවා.
මෙම තත්ත්වය යටතේ මෙම පාසලේ දරුවන්ගේ මෙන්ම ආචාර්ය මණ්ඩලයේ පැමිණීම ද පහළ යමින් පවතින බවයි වාර්තා වන්නේ.
මෙම පාසලේ සිසුන් 4200 ක් පමණ ඉගෙන ගන්නා අතර ගුරු මණ්ඩලය 165 ක් වනවා.
පාසල් භූමියේ රසායනාගාර ගොඩනැඟිල්ලේ ඉදිකිරීම් තාවකාලිකව නවතා තිබෙන අතර ඉදි කිරීම් භාරව සිටින කොන්ත්රාත්කරුගේ නොසැලකිළිමත් කමින් වැඩබිම ප්රදේශය පුරා ජලය රැස් වී පවතින බව ද අප වාර්තාකරු කියා සිටියා.
පාසල් ඉඩම දෙපස පිහිටි කුරුණෑගල වැවිලි සමාගම සතු ඉඩමේ සහ වයඹ කෘෂිකර්ම අමාත්යාංශයට අයත් ඉඩමේ විවිධ ස්ථානවල මදුරු වළවල් තිබෙන බව ද සඳහන්.
කුරුණෑගල මෙම පාසලේ පමණක් නොව අවට පාසල් ද ඩෙංගු අවදානමට ලක් වීමට ඉඩ ඇතැයි අප වාර්තාකරුවන් කියා සිටිනවා.
විශේෂයෙන් ඇතුගල අවට විශාල වලවල් ඇති අතර ඒවායේ ජලය පිරි ඩෙංගු කීටයන් බෝ වන බවයි ඔවුන් පවසන්නේ.
වැල්ලව, මද්දේගම ප්රදේශයේ පදිංචිව සිටි කුරුණෑගල සර් ජෝන් කොතලාවල විද්යාලයේ 6 ශ්රේණියේ ඉගෙනුම ලැබූ කවිනි ගයේෂා ලංකාතිලක නමැති අවුරුදු 11ක දියණියක් ඩෙංගු වැළඳීමෙන් ජීවිතක්ෂයට පත් වුනා.
මෙම දියණියට වැඩිමහල් සහෝදරියක්ද සිටින අතර ඇය එම පාසලේම 10 වන ශ්රේණියේ ඉගෙනුම ලබනවා.
උණ රෝගය වැළඳීමෙන් පසුගිය 21 වනදින කවිනි කුරුණෑගල ශික්ෂණ රෝහලට ඇතුළත් කළ අතර ඩෙංගු රක්තපාත තත්වයට පත්වීම හේතුවෙන් දැඩිසත්කාර ඒකකයට ඇතුලත් කළ පසු ඉකුත් 25වන දින මියගොස් තිබුණා.
මෙම සිසුවිය 2012 වසරේදීත් ඩෙංගු රෝගයට ගොදුරුව තිබෙනවා.
සිසුවිය මිය යන විටත් එම පාසලේ ඉගෙනගන්නා පාසලේ සිසුවියන් 40 දෙනෙකුට ආසන්න පිරිසක් සහ පාසලේ සංගීත විෂය භාර ගුරුතුමියද මේ වනවිට ඩෙංගු රෝගය වැළඳීමෙන් කුරුණෑගල ශික්ෂණ රෝහලේ ප්රතිකාර ලබන බවයි වර්තා වන්නේ.
ප්රදේශයේ ජනතාවගෙන් 150ක් පමණ කුරුණෑගල ශික්ෂණ රෝහලේ ප්රතිකාර ලබන බව ද ඒ වනවිට වාර්තා වුනා.
පාසලේ නව ඉදිකිරීම් කටයුතු සිදුවන අතර වැසි කාලය ඉක්ම යාමත් සමග ඉදිකරමින් පවතින ස්ථරවල ජලය රැඳීම හේතුවෙන් සර් ජෝන් කොතලාවල බාලිකා විද්යාලයේ ඩෙංගු පැතිර යන බවටයි වාර්තා වන්නේ.
මෙම පාසලේ පමණක් නොව කුරුණෑගල ප්රදේශයේ තවත් පාසල් බොහොමයක දරුවන් ඩෙංගු රෝගය වැළඳීමෙන් කුරුණෑගල ශික්ෂණ රෝහලට ඇතුළත් කර ඇති අතර එම විද්යාලවලද නව ඉදිකිරීම් කටයුතු හේතුවෙන් මෙම තත්වය උද්ගත වී තිබෙනවා.
තවද එම පාසල්වල සහ පන්තිවල ඉඩ ප්රමාණයේ අඩුවක්ද දක්නට ලැබෙනවා.
කුරුණෑගල මහා නගර සභාවේ අතිරේක වෛද්ය නිළධාරී රෝහණ සමරකෝන් අප වාර්තාකරුවන්ට පවසා ඇත්තේ සඳහන් කළේ කවිනි ඉගෙනගත් පාසලේ ඩෙංගු කීටයින් සිටින බවට කිහිපවරක් තොරතුරු ලැබුණ බවත් ඒවා විනාශ කර දැමීමට පියවර ගත් බවයි.