මුගුරකින් සහ තියුණු ආයුධයකින් පහර දී ඊයේ සවස සුරියවැව ප්රදේශයේදී පුද්ගලයෙකු ඝාතනය කර තිබෙනවා.
වගා ළිඳක් හෑරීම සම්බන්ධයෙන් අය විය යුතුව තිබු රුපියල් 5000ක මුදලක් ලබා ගැනීමට නිවසකට ගිය අවස්ථාවේදී මෙම ඝාතන සිදුකර ඇති බවයි වාර්තා වන්නේ.
අදාල නිවසේ සිටි පියා සහ දියණිය එක්ව මෙම ඝාතනය සිදුකර තිබෙනවා.
මෙලෙස ඝාතනයට ලක්වූ පුද්ගලයා සූරියවැව, සමාජසේවා පුර ප්රදේශයේ පදිංචිව සිටි 42 හැවිරිදි දෙදරු පියෙක් බවයි සූරියවැව පොලිසිය පවසන්නේ.
ඝාතනය සිදුකළ බවට සැකකරන පුද්ගලයා සහ ඔහුගේ දියණිය මේ වන විට ප්රදේශයෙන් පළාගොස් තිබෙනවා.
මියගිය පුද්ගලයා සහ සැකකරු සමඟ එක්ව වගා කටයුතු සිදුකර ඇති අතර මෙහිදි වගාව සදහා ජලය ලබා ගැනිමට මියගිය පුද්ගලයාගේ වියදමින් වගා ළිඳක් සකස් කර තිබෙනවා.
පසුගිය කන්නයේදී වගා ළිඳ උපයෝගි කරගෙන දෙදෙනා එක්ව වගා කටයුතු සිදුකළ නමුත් වගාව පාලු වී ඇති බව සඳහන්.
පසුව මෙවර කන්නයේදී සැකකරු විසින් තනියම වගා කටයුතු සිදුකර ඇති අතර ඒ සදහා ජලය ලබාගෙන ඇත්තේ අදාල වගා ළිඳෙන්.
ඒ සදහා මරණකරුට සැකකරුගෙන් රුපියල් 5000ක මුදලක් ලබා දෙන ලෙස කිහිප විටක් ඉල්ලා ඇතත් එය නොලැබිම හේතුවෙන් ඊයේ සවස එය ලබා ලබා ගැනීම සඳහා සැකකරුගේ නිවසට ගොස් අදාල මුදල් ඉල්ලා තිබෙනවා.
එහිදී දෙදෙනා අතර ඇති වු බහින් බස් වීමක් දුරදිග යාමෙන් ඇති වු ආරවුලක් හේතුවෙන් පහරදීම සිදුකර ඇති බවයි වාර්තා වන්නේ.
පහර කෑ දෙදරු පියා සැකකරුගේ නිවස ඉදිරිපිටදිම මියගොස් ඇති අතර සිද්ධිය සම්බන්ධයෙන් සැකකරු සහ ඔහුගේ 20 හැවිරිදි දියණිය සොයා පොලීසිය මෙහෙයුම් ආරම්භ කර තිබෙනවා.