අපේ රටේ ප්රදේශ රැසකින් මේ දිනවල ඩෙංගු උණ රෝගීන් ගෙන් රෝහල් පිරි ඉතිරී ගොස් ඇති බව අසන්නට ලැබෙනවා.
මේ අතර මොරටුව විශ්ව විද්යාලයේ තාක්ෂණ පීඨයේ තෙවන වසර ඉගෙනුම ලබමින් සිටි චේතනා අබේකෝන් උපාධි අපේක්ෂිකාව ඩෙංගු උණ ට ගොදුරුවී පසුගිය ජුලි 1 දින මියයාමේ පුවතක් පසුගියදා අසන්නට ලැබුනා.
එම පුවතින් පසු ජුලි මස 2 දින බදුල්ල ප්රදේශවාසින්ට අසන්නට ලැබුනේ එවැනි තවත් පුවතක්. බදුල්ල මහ රෝහලේ ඩෙංගු උණට ප්රතිකාර ලබමින් සිටි පාසල් දරුවෙක් මියගොස් තිබෙනවා. එලෙස මියගොස් තිබෙන්නේ බදුල්ල බෝගහමඩිත්ත පදිංචිව සිටි බදුල්ල නගරයේ පිහිටි බදුල්ල මධ්ය මහා විද්යාලයේ 11 වසර ඉගෙනුම ලබමින් සිටි 16 හැවිරිදි තිමිර ඉසුරංග විජේවර් ධන නැමැති ඉගෙනීමට දක්ෂ පාසැල් සිසුවකුයි.
බදුල්ල මහ රෝහලේ අධිකරණ වෛද්ය නිලධාරි ආර්.එම්.යු.එන්. ළිදවත්ත පශ්චාත් මරණ පරීක්ෂණ පවත්වා ඩෙංගු උණරෝගය උත්සන්න විමෙන් සිදු වු මරණයක් බවට මෙය තීරණය කර තිබෙනවා.
මෙම මරණයත් සමගම මගතොට හමුවන බොහෝ දෙනාගේ තදබල කතා බහ වුයේ ඩෙංගු උණ රෝගයයි.බදුල් ල මහ රෝහලේ තවත් රෝගීන් හැටක් පමණ දෙනා නේවාසිකව ප්රතිකාර ලබමින් සිටින බවත් දිනෙන් දින රෝගීන් සංඛ්යාව ඉහල යමින් පවතින බවත් රෝහල් ආරංචි මාර්ග පවසනවා.
මේ සමගම ඊට පසුදිනද බදුල්ල ප්රදේශවාසීන්ට තවත් ඛේදජනක ඩෙංගු මරණයක් අසන්නට ලැබුණා. එදින මරණයට පත්වි සිටියේ බදුල්ල නගරයේ පිහිටි සරස්වතී දෙමළ මහා විද්යාලයේ 10 වසර ඉගෙනුම ලබමින් සිටි 14 හැවිරිදි සසී කුමාර් කරිශ් නැමැති දරුවෙකුයි.
මෙම මරණයද පශ්චාත් මරණ පරීක්ෂණය පැවැත්වු බදුල්ල මහ රෝහලේ අධිකරණ විශේෂඥ වෛද්ය නිලධාරි එච්.ටී.කේ .විජේවීර ඩෙංගු උණ රෝගය උත්සන්න වීමෙන් සිදු වු මරණයක් බවට නිගමනය කර තිබෙනවා.
අපේ රටේ දැනට මදුරු වර් ග 140 ක් පමණ සිටින බව සොයා ගෙන තිබෙන අතර මොවුන් ගෙන් ඩෙංගු රෝග කාරක වෛරසය සංසරණය කිරීම සඳහා දායකවන්නේ ඊඩිස් ඊජිප්ටයි ( Aedes Aegypti ) හා ඊඩිස් ඇල්බොපික්ටස් (Aedes Albopictus )යන මදුරු විශේෂ දෙක බව කීට විද්යාඥයන් පෙන්වා දී ඇත.
බදුල්ල නගරයේ සහ තදාසන්න ගම් ප්රදේශවල ඇවිදයන කොයි කාටත් ජලය බැස නොයන කාණු පද්ධති,පොලිතීන් සහ ප්ලාස්ටික් බෝතල් ආදි දේ හිරවි ඇති මැසිමදුරුවන් පිරුනු කැලෑවට යටවුණු දුගඳ හමන කාණු කොතකුත් දක්නට ලැබෙන බව අප වාර්තාකරු පැවසුවා.