මහනුවර කිංග්ස්වුඩ් විදුහලේ පාසල් සංවර්ධන සමිති මුදල නොදුන් සිසුන්ට පළමු වාර පරීක්ෂණය පෙනී සිටීමට පාසල් බලධාරීන් ඉඩ නොදුන් බවට වාර්තා වෙනවා.
රුපියල් හයදහස් දෙසිය පනහක මුදලක් එසේ සංවර්ධන සමිති මුදල ලෙස ගෙවීමට තිබෙන බවත් එම මුදල නොගෙවූ බව කියන සිසුන් සියදෙනකුට ආසන්න පිරිසක් සිටින බවත් සඳහන් වෙනවා.
පළමු වාර පරික්ෂණ ප්රශ්න පත්ර බෙදන අවස්ථාවේදී විද්යාලයේ බලධාරීන් දැනුම් දී ඇත්තේ අදාළ ගාස්තු නොගෙවූ සිසුන්ට පන්ති කාමරවලින් පිටතට යන ලෙසයි. මේ සම්බන්ධව මහනුවර කලාප අධ්යාපන අධ්යක්ෂ ඩබ්ලිව්. එම්. විජයරත්න මහතාට සිසුවෙකුගේ මාපියන් ලිඛිත පැමිණිල්ලක්ද කර තිබෙනවා.
ඒ පැමිණිල්ල අනුව කලාප අධ්යාපන අධ්යක්ෂවරයා 27 දා පස්වරු 3.00 ට පමණ කිංස්වුඩ් විදුහල්පතිවරයාට ෆැක්ස් ලිපියක් මගින් දැනුම් දී ඇත්තේ සංවර්ධන සමිති මුදල් නොගෙවීම හේතුකොට ගෙන වාර විභාගයට පෙනී සිටීමට ඉඩ නොදී සිටිය නොහැකි බවයි. ඒ නිසා ළමුන්ට විභාගයට පෙනී සිටීමට ඉඩ දෙන ලෙස කලාප අධ්යාපන අධ්යක්ෂකවරයා නියෝග කර තිබෙනවා.
පාසල් සංවර්ධන ගාස්තු එකවර ගෙවා නිම කරන ලෙස විදුහල්පතිවරයා කළ දැනුම් දීම මත ඇතැම් දෙමව්පියෝ විභාගයට පෙරදින කනකර උකස් තබා මුදල් ගෙවා ඇති බවද වාර්තා වෙනවා. එසේ නොවුණේ නම් සිය දරුවන්ටද විභාගය ලිවීමට ඉඩ නොලැබෙන බවද දෙමව්පියෝ පැවසූ බව ලිඛිත පැමිණිල්ල සිදු කළ පියා ප්රකාශ කර තිබෙනවා.
මේ අතර මහනුවර - කිංග්ස්වුඩ් විද්යාලයේ සිසුන් පිරිසකට වාර විභාගයට පෙනී සිටීමට අවස්ථාව ලබා නොදීම සම්බන්ධයෙන් වහාම පරීක්ෂණයක් සිදුකරන ලෙස අධ්යාපන අමාත්ය අකිල විරාජ් කාරියවසම් අමාත්යාංශ ලේකම්වරයා වෙත නියෝග කර තිබෙනවා.
ඒ අනුව පාසලේ විදුහල්පතිවරයාගෙන්ද ඒ පිළිබඳ නිදහසට කරුණු විමසනු ඇති.